الشعب العماني العجيب
ومحافظته عالبيئه في اعادة التدوير
وهذي بعض الأمثلة


اللباس العماني في حالة قدمه وعدم الرغبه في إرتدائه مرة أخرى

الوزار :
1- يستخدم كفوطه
2- يستخدم كلحاف عن البرد
3- يسوى منه صوار حال الفلج
4- يشرخ ويسوى منه شناطيط
5- يشرخ ويسوى منه فوط حال تنظيف السيكل



الدشداشه :
1- بتعطيها أخوك الصغير يلبسها بعد أن يقصرها
2- تستخدم كفزاعه حال الطيور عن ياكلن من حشيش الذره(الحريه)


الفالينه نوع كابتن :
1- تستخدم في المطبخ يوم تبغى تمسك الصفريه وهيه ساخنه
2- تستخدم كفوطه لتنظيف الدرايش والطاولات وبعض الربع سياراتهم


الليسو :
1- يلحف به الصغير يوم ينام
2- يقمط به الصغير يوم تتون
3- يستخدم كمسند للجحله او الصفرية يوم تحط فوق الراس




العبايه :
1- يعطيوها الشغاله تلبسها ولو تموت ما بيفصللها جديده


الشيلة :
1- يلحف بها عذق الرطب عن الطيور تااكل من الرطب
2- يشل عليها حزمة الجت ولا الحشيش بعد الجز والحشاش




النعال :
1- مطرقه لتكسير الجوز
2- أداة قتل للصراير فما في داعي تشتري فليت



الأدوات المنزلية

كرتون الطماط :
1. يحرق ويسوى منه صخام حال مجمر البخور(البعض)
2. يستخدم كرسي يوم تجلس الحرمه تخبز بدل الطابوقه)
3. يستخدم كبيوت للحمام



غرشة الفيمتو يوم تخلص :
1. تستوي غرشة عسل
2. تستوي غرشة ماء ورد
3. تستوي غرشة زموتا (ماتعرفوه سألوا شيابكم)


غرشة التانج :
1. يسوى فيها بخور
2. يسوى فيها سمن
3. يسوى فيها صندل ولا دهان حال العجايز

دبة الزيت :
1. تغسل ويسوا فيها ماي من الطوي وتخلى في الثلاجه ماي للشرب
2. تقص وتستخدم في حمامات المساجد ..الله يعزكم..

الجرايد :
1. مفرش للأكل
2. مفرش لقفص الحمام


التيوب :
1. جلده حال النشاب
2. طوق نجاه حال اللي يتسبحوا في الوديان

القواطي :
1. يسوابهن شبح حال التنقيع بالكسر
2. يفعصن ويجمعن فجونيه ويباعن

الوايرات :
1. يحرقن ويباعن كمعدن
2. يستخدمن حال تعليق الملابس عشان يجفن بعد الغسيل


الأكل والغذاء

العجل بعد ما يذبح وياكل اللحم والشحم :

1. الجلد يسوى منه طبل
2. المصارين يسوى منهن معاصيب
3. الكرش بعد ما تنظف تقلى ويصيح الأكل فيها
4. العظام يطبخن ويثورعليهن بماي وبعدين ياكلن سوب
5. الراس يفتله عينه فت وحتى العيون واللسان ما يسلمن

هههههههههههههههه
وانت الصادق مشكور اخوي ع الطرح الرائع
تقبل مروري

ملاك اشكر مرورك

المشاركة الأصلية كتبت بواسطة ملاك وعيوني دواك هههههههههههههههه وانت الصادق مشكور اخوي ع الطرح الرائع تقبل مروري