الضحكة الكذوبة



تضحك ومن هجرك فوادي مكدّر

وتداري أحزاني بضحكه كذوبة

وجدي تفجّر في ضميري ودمّر

أحصون صبري وما ليه عنك توبة

حاولت نسيانك ولكن تعذّر

عليّ نسيانك بنفس امغلوبه

ما انته الوحيد اللي بحسنك أمصور

مثل البدر حسن ودلال وعذوبة

تلعب بإحساسي يا ليت أتذكر

أني بشر وإحساس ما يلعبوا به

لكن قلبي بك لوحدك تأثّر

وروحي على حبّك أراها امغصوبه

صّدقت فيّه عاذلٍ ساعي ابشر

ما حس قلبك إن خلّك سعوا به؟

وصدّيت عنّي عامدٍ واتّعَذّر

ما أتخاف يا ظالم تصيبك عقوبة؟

واللي دهاني منك ما حدّ يقدر

على علاجه منه روحي امعطوبه

بي شي بالأنفاس يحيا ويكبر

ويموت بالأنفاس يا ذي عجوبه؟