منتديات جعلان > جعلان للشعر والترفيه > جعلان للقصص والروايات | ||
من بد كل الخلايق حبيته.. |
الملاحظات |
|
أدوات الموضوع | انواع عرض الموضوع |
|
جعلاني فعال
غير متواجد
|
><><><><><><><><><><><><><><
><><>< فبيتنا@ بدت الحياه ترجع شويه شويه والسبب الرئيسي هو رجوع عمي صالح من ألمانيا((( صح نسيت أقول لكم عنه..عمي صالح أكبر مني بسنتين أو ثلاث تقريبا,, كنا أني وياه مثل التوأم نشتري رباع نسوي مشاريعنا رباع حتى انه مره ربعه سموه سبير أحلام هههه.. كانت أيام حلوه بس من بعد ماسافر بدت الرسميات مبينا,,والكل لاحظ أذيه التغير.. فجأه قطع تفكيري صوت تيلفوني: بسم الله من يتصل لي ألحين ركضت داخل وطلعت تيلفوني من الكبت أحلام: سوير..والله أشتقتلهي وايد,, (وببتسامه حزينه) هلا بطش ساره: هلابج حبيبتي.. هاكيفج ألحين؟؟ أحلام: بخير دامك بخير ساره: ومتى ناويه تشرفي ياالكسوله؟ أحلام: الصراحه ودي أأجل أذيه السنه ساره: هوو..ليش؟؟ أنتي موب أول وحده ولا أخر وحده تتوفى عمتها أحلام: بسم الله ,كليتيني.. كل أذيه شوق لي؟ ساره: إذا مااشتقت أحلام حبيبتي الدبا لمن أشتاق؟؟ "فأذيه اللحظه دخلت شيخوه" شيخه: أنتي هنيه وأني ادورك؟ أحلام: خيير؟؟؟! شيخه: هين ثوبي الأزرق ؟ الي لقيتيه فكبتك بارحه.. أحلام بتهزيه: ناشده عنه,, ساره: شو؟؟ شفت أمي داخله فقلت: ولاشي حبيبتي اكلمك بعدين!..أوكيه مع السلامه شيخه: اليوم أمي عندهي شي.. كل شويه تتبسم,, هاأم يمعه هيش عندك؟؟ أمي: توقعن من كان عند ابوكن بارحه ويطلب القرب؟؟؟ ><><><><><><><><><><><><><>< ><><>< فز قلبي وأهتزت أوتاره... من سمع بطاريك ياخلي مدري وش جراله!! أن قالو جيت ينشرح لك الصدر وأحباره., وأن قالوا غبت يغم القلب وتتبدل أحوال., @من كلماتي@ أمي والابتسامه مافارقتهي: سالم ولد خالك..! (( ماحست ألاقلبي يرقع يرقع {طبول} وعظامي خلاص مجدرت تشلني ولساني يرجف حتى الحروف متطلع من ثمي... كملت أمي وشيخونه تتبسملي: بارحه يي مع خالكن.. يبو يحيرو شيخه لسالم لين تخلص دراسه هههه مبروك أم كشه شيخه: هــــــاه أنشل لساني..وتحطمت أحلامي وتزعزعت آمالي..وماكان جدامي غير أني احضنهي وابكي.والعبره خانقتني : مبروك ياالخاينه..كيه بتتزوجي قبلي! شيخه تبكي: مستحيل اسويها قبل مااشوفك بثوب عرسك,, أمي: اييه هيش صارلكن؟ قلبتنهي عزي مسحت دموعي ورفعت تيلفوني الي يدق: الووو فطان بصوت متقطع : أحلام.. هدى.. غمظت عيوني" ياربي ارحمني..بسي من المصايب والهموم": اشفيها هدى؟؟ فطان: هدى طاحت علينا والدكتور يقول ياها انهيار عصبي.. "الحين حسيت انه فيه قاسم مشترك بيني وبين هدهد,, لايا ربي ليش أني واذيه البنت مكتوبلنا الهم.. اللهم اني لااسألك رد القضا ولكني اسألك اللطف فيه يارب ارحمنا يارب" ><><><><><><><><><><><><><><><><><><><><><><><><>< ><><>< الجزء السادس فتحت عيوني شوي شوي.. "يالله ياثقلهن" تشوفت جنبي شفت أحلام مطوقه ايديهي وحاطه راسهي عليهم وراجده.. بس لاحظت شي! فيه دمعه متعلقه فرموشهي!! بسم الله هيش صاير معهي؟؟ بارحه بعد مروحت أمي كانت تسولف وتضحك! لا لا اكيد صاير شي؟ قطعت عليه افكاري الممرضه: ها هدى كيف حالك اليوم ؟؟ هدى ببتسامه باهته: الحمد لله سوتلي الممرضه السجايه وطلعت..ناظرت فالفراغ وراها "ياالله..معقوله الي يصير معي؟؟ (تشوفت أحلام وقضمت أظافري غيض) واحس ان قلبي بيوقف كل ماتذكر ويههي الحماره..اااخ بس لو اشوفهي جدامي بقطعهي بضروسي.." حسيت انه أحلام بدت تفتح عيونهي خذت كلنكس ومسحت ويهي وقلت ببتسامه": صبحبح أحلام: هههه ماطيقي؟ صبحك الله بالخير..عن اذنك دقيقه بغسل ويهي وبيي @ بعد مااختفى خيالهي عني سمعت صوت مسج..مديت ايدي وفتحته "الروح" فديت وقتن حط في دربي .:. عزيز.:. واحدن يضحك معي واضحك .:.معه.:. واحدن لا صار وسط القلب .:.ضيق.:. بالسوالف والمزايح .:.وسعه.:. وان حكي باسلوبه العذب .:.الرقيق.:. يسرق من الجوف قلبن .:.يسمعه.:. تأملت الرساله شويه..مااقول انه قلبي ماحن له! بس دفنت هالأحساس بداخلي.. مسحت المسج وبندت التيلفون كله على دخلت أحلام.. (أحلام) !! خلونا فأحلام وش صاير لهالبنت متغيره 180درجه.. يات وجلست علي طرف الكرفايه.. هدى: هيش فيك الحلم؟؟ لاتخبي عليه أحلام ببتسامه باهته على غير عادتها الربشه: سفينتي غرقت ياهدى..(ترفع كتوفها) لأنه ماعاد لها ربان!! زميت شفايفي بقهر: قصدك سالفة سالم.. بس بارحه كان شكلك راضيه؟؟ أحلام: قلتيها شكلي راضي بس أذيه(تأشر ع قلبها) مب راضي حتى يتقبل الواقع! هدى (والدمعه بعيني): أحلام حبيبتي كل شي قسمه ونصيب ونصيبنا ماناخذهم,,, ماحسيت إلا بجسمها الساخن يرتمي بحضني وقالت بقوه وصبر: هدى.. لاتضيقي علي عمرك أن شاء الله كل شي بيعدي علي خير "السلام عليكم" فكتني أحلام ونطت جنب امهي: هلا بالغاليه أمهي: هلا بأمورتي..هيش فيها عيونك..أكيد هدوه ماخلتك ترجدي طول ليلك؟! هدى:أني خالتي..الله يسامحك أحلام: ههه تستأهلي.. إلا ماه من يابك؟؟ خالتي: وبويه نسيت صالح.. تغطي هدى يبا يسلم عليك (دخل صالح وسلم وقعد شويه..وقبل مايطلع): أحلام تعالي اباك خالتي: هين؟ هين ماشين عني؟؟ صالح: هههه بنروح صوب رأس الحد شويه وبنرجع...أنتي قعدي عند بنت ختك وأني بشل بنت خويه! خالتي: أنزين بس لاتسوو سواتكم من زمان تقعدو لين 12 بالليل البنيه كبرت ألحين مب ياهل أحلام بدلع: أصلا من قال اني بروح؟؟؟ صالح يمسك ذراعهي: بتروحي غصبن عليك.. ><><><><><><><><><><><><><><><>< ><><>< ><>< بعيد عن دوشة المستشفى.. تحت ظل الجبل فوق رمول جعلان البارده "كنت جالس وانا تايه..مهموم عايف حياتي,,عايف الدنيا, ماعرفت كبر غلطتي إلا بعد ماشفت طرف عباتها يطلع من بيتنا.. حسيت وهي تطلع من بابنا كن روحي طلعت من مكانها.. ياالله ياهدى يومين وحسيتهم دهر يمر عليه من دونك..فكيف بالسنين اليايه" خذت فكفي رمل ونحتت أسمها علي الأرض وأني اردد كيف؟؟ كيف أعتذر لقلبا من جروحي مكتفي؟؟ كيف ارجع الماضي وارضيك ياروحي؟؟ ليتك ياهدى تدري بحال محمد من بعدك,, واشكثر غرقته الهموم وحرقه الشوق!! شفت نيسان أسود يقربي مني فزفرت من قلبي: اووووف أذيه هيش يايبنه ألحين؟ وقف بعيد ونزل..جرب مني وجلس مجابلني: هاحميد هيش فيك ماترد عليه ولاتعبرني؟؟ محمد: والله مشتقتلك عشان ترز ويهك عندي هنيه سعد: ألحين اني عاطنك ويه وياينك متعني..أذيه يزاتي محمد: سعد ضف ويهك عني.. تراك تعرفني لما اعصب سعد: الحين ابا اعرف انته زعلان عشان هدى ولا عشان خالتي موزه هزبتك! رفعت حيان واحد بعصبيه: سعــــــــــــــد... أنته تعرف انه عمتي موزه مقدور عليها بس اني همي هدى..هدى اعرفهي مب راضيه ابدا.. سعد: هههه كيه منقدر عليك العاشق الولهان ههههه محمد: قايلك من أول تبا تتمسخر لا تي.. سعد حط ايده علي ثمه: لابس خلاص... حمود؟؟؟؟ محمد: سكت عني.. (انسدحت علي ظهري وحطيت ياديه ورا راسي..وأني افكر كيف ممكن ارجع هدى؟؟ ومعقوله أنه فيوم من الأيام هدى تطلب الطلاق؟؟ او أنه امها تجبرها عليه مثل ماقالت؟؟) ><><><><><><><><><><><><><><><><><><><><><><><><>< كنت عارفه انه يبا يسألني عن الي مضايقني.. بس مستحيل مستحيل أقوله..مستحيل أخبره عن الي حارق قلبي,, صالح: الحلم هين روحتي؟ أحلام ببتسامه: عند صلوح صالح: هههه لاتغيري الموضوع ياالحياله! يله اعترفي تفكري فمن؟؟ أحلام بنص عين: يعني غصب تبا تهيتني ياالهايت؟؟ "سكت ولارد - اني أعرف انه يبا يستدرجني عشان اقول له بس (فأحلامه)..خذني لمكان يطل علي البحر بس مرتفع عنه شويه,,نزلت قبله وجلست قبال البحر..تأملته فأستملكني شعور غريب ممزوج بالعبره.. التفتت لعمي كان يكلم بالتيلفون وشكله معصب..رديت أتأمل البحر وعمقه هل ياترى لو دفنت فيه احزاني بتكفيه ولأ بتفيض مثل مادموعي تفيض ألحين.. ><><><><><><><><><><><><><><><><><><><><><><><><><>< اكلمهم عن همومي وعن جروحي وعن التحنان يقولون العشق كذبه وكل الحب أسطوره! أعاتبهم وأنا بقلبي أحس بداخله بركان أخاف تموت أمالي بلحظه يأس مقهوره تعبت أواجه الدنيا تعبت أواجهك يا الإنسان.. أبي لي قلب يفهمني من الإحساس به صوره إلهي ليه أنا وحدي أعيش أحلام مبتوره خذني لمكان يطل علي البحر بس مرتفع عنه شويه,,نزلت قبله وجلست قبال البحر..تأملته فأستملكني شعور غريب ممزوج بالعبره.. التفتت لعمي كان يكلم بالتيلفون وشكله معصب بس مافي اطيب من قلبه.. رديت أتأمل البحر وعمقه هل ياترى لو دفنت فيه احزاني بتكفيه ولأ بتفيض مثل مادموعي تفيض ألحين.. "ياعالم أني انسانه عندي مشاعر..معقوله هو مايباني عشان لساني طويل..بس اني لساني مب طويل!!! حرام عليك ياسالم طول عمري وأني احلم باليوم الي يجمعنا,,وكيف راح تكون حياتنا مع بعض,, بالأخير تي بكل سهوله وتمسح أحلامي بكل عنف وبدون رحمه..بكل سهوله تقطع الدم الي يسري فعروقي!! طيب أني هيش ذنبي أني حبيتك؟..أني هيش ذنبي أشوفك طالع داخل على بيتنا بس مب لي.. لأختي..أني هيش ذنبي؟؟" فجأه حسيت بذراع دافيه طوقت كتوفي بحنيه..حطيت راسي علي كتفه واني اتأمل دموعي الي وسخت ثوبه الابيض.. رفعت نظري له لما قال: وألحين بتقولي هيش الي مزعلك؟؟ أحلام: مستحيل.. ألحين مجدر أقولك غير انه قلبي ذبل من كثر الهموم.. صالح: أحلام.. كلما خبيتي بقلبك كلما هالشي أتعبك اكثر رصيت علي كتفه برأسي: يعني بموت..؟؟ أحسن صالح من بين ضروسه: أحــــــــــلام.. أحلام: صالح ارجوك خف عليه شويه..أني بروحي تعبانه صالح: أحلام أنتي طول عمرك تقوليلي الي بقلبك.. ليش ألحين لما انك محتاجه تفضفضي ماتقوليلي,, أحلام: الكلام مب منه فايده.. أني ألحين بس ابا ارجع الجامعه..اقضي وقتي ع الاقل بدل الحبسه والضيق.. صالح: أني اشوف أنه أحسن تأجلي وبقدملك اوراقك بأقرب وقت ع الاقل هنيه عندك شيخه تفضفضيلهي..هناك محد عندك أحلام بستهزاء: هههه شيخه؟؟؟؟ ..شيخه خليها تجابل عمرهي ألحين وراها عرس بعد كم سنه صالح ضربني بالخفيف علي راسي: لا تستخفي بأختك.. و هل هلله فيها.. أني بروح ايبلك ماي مسحي دموعك فديتك,,الدنيا متسوي... ><><><><><><><><><><><><><><><>< ><><><>< ذكرى مرت عليها 10 سنين* كنت جالسه علي دري المطبخ ارسم لما دخل محمد ومعه سالم ووسطهم هدى شاله دناها من البكى..كان الدم يسيل من فوق حيانها ومحمد يحاول يهديها.. فزيت من مكاني صوبهم ومسكت راسهي بكفوفي : من فلعهي؟؟ سالم: حمد كان يبا يصيب محمد بس يات فرأس هدى محمد: هدى.. تعالي معي داخل المطبخ.. "بعد اذيك اللحظه صرت صامت ماغير اتأمل اهتمام محمد بهدى وكيف يداويها ويهديها.. كنت أتشوف علي الثور سلوم واتمنى يكون مثل محمد.." بوجاسم انسان طيوب..وقلبه كبير يحب هدى من كل قلبه بس مايرضى علي اهله! هو شكلن مقبول بس الي يعيش معه ويدرس قلبه..راح يشوف انه محد اجمل منه.. صراحه لو كانت هدى مب موجوده فهالوجود كان راح يكون هو فارس أحلامي بدال هالخبل لابركة فيه.. المهم طلعت هدى اليوم..وصارت زحمه فبيتهم خالاتي وخوالي وعيالهم مغثه.. عشان كيه رجعت بيتنا وحدي وتسنترت جدام التلفزون ساعتين.. مليت فدقيت علي صلوح فديته محد يعرف قيمتي غيره- بعد دقتين صالح: هلا بوشباب أحلام: بوشباب؟؟؟ ميخالف مقبوله منك اهلين.. هينك؟؟؟ صالح: عند ربعي شي فخاطرك؟؟ أحلام: مالت مخلني وحدي وجالس مع هالخواريف صالح: هههههههههههههههههههههههههههههههههههههههههههههههههه هههههههههه والله لو يسمعوك ألحين..بيذبحوك.. أحلام: متهممه عاد.. وألحين بتي ولأ لا؟؟ صالح: والله مجدر.. نزين دق علي بوفراس خليه يسليك أحلام: أقول تجدر تضف ويهك وتنجلع صالح: ههههههه زعلت بوصالح أحلام: وووع ولدي أني اسميه صالح..ووع رجيتك صلوح لاتقولهي! صالح: افــــــااا أحلام: لاتزعل صلوح..أنته بتسمي بنتك أحلام قصب.. بس أني مستحــــــــــــيل@ صلوح اخليك ألحين اشوف بويه ياي 'بندت التيلفون وفزيت على طولي وحبيته ع راسه' هلا بويه بويه: هلا .. من كنتي تكلمي؟ أحلام: أخوك الهبل بويه بنظره تروع: أنتي كبرتي علي أذيه الحركات كبري عقلك كون! أحلام*أشفيه بويه يشوفني مينونه جدامه؟*: خير بويه؟؟ ليش ألحين تقولي أذيه الكلام؟؟؟؟ بويه بعصبيه: لأنك صرتي حرمه وعيب الي تسويه..حتى يمعه أخوك متسوي ماعه الحركات الي تسويها لصالح! أحلام * أعوذ بالله..أشفيه بويه؟ كنه خايف علي أخوه مني! والله أني مأكل..* دمعت عيوني: أن شاء الله بو يمعه مب ضارتنه أخوكــ.. شي ثاني مسكني من كتوفي: أحلام أني قصدي أنك بنت علي ويه زواج..و الي يشوفك أنتي وصالح بيغض النظر عنك.. فهمتيني ياعيوني؟ هزيت رأسي - بنعم- وأني أفكر" لهالدرجه صرت حمل ثقيل عليه؟؟ مب مليوم شيخووه الصغيره أنخطبت وأني البقره العوده بعنس وبقعد على قلبه" شليت عمري ودخلت حجرتنا ودقيت علي هدى الله يخليها لي,, ><><><><><><><><><><><><><><><>< ><><><> |
جعلاني فعال
غير متواجد
|
ماتمــوت المشاعـــــــر دام "قلبـــــــي" يحتويك.. وماتضيع المحبه دام يملكني >>غـــــــ ـ ــ ــ ــــــــلآك<< الجزء السابع تبي تعرف وش أخباري؟ وبعدك كيف أيامي؟ أنا بعدك غريب الدار..مع قلبا محتضن غالي.. مع أنغام الشعر والليل..ودمعات تحتضن بالكف,, وجسما مابقى به حيل عذاب الوقت به يلتف.. سمعت الي يذوق المر؟مصيره يشرب الصافي..ولكن يازمان تمر...ماشفتك معي وافي! بشهقه وحرقه تذكرت كل يوم مر عليه وأني اجهز ليوم عرسنا..تذكرت فرحتي بدخلت ابويه وناصر يوم الملكه عشان يباركولي.. ويخبروني أني خلاص أنكتبت له.. حطيت أيديه على ذرعي وحركتهم فوق تحت~ حتى ادفي عمري من البرد..: ااااااف اليوم وايد برد.. هينك أمي؟ كل أذيه فبيت فطان.. (والصدفه أنها دخلت علي أخر حرف نطقته) أمي: هدى هيش مطلعك فأذيه البرد؟؟ هدى: طالعه ادورك..أشوفك تأخرتي وايد أمي: دخلي دخلي.. خليني أخبرك عن ولد اشمايهي فطان هيش مستويله هدى: ههههه مطيقن عن التك فالناس هه (دخلنا وبدت أمي بسعود وخلصت عند شيخه بنت خالتي وعرسهي.. هههه صدق بوطبيع مايوز عن طبعه!!) دخل علينا ناصر وويه مايبشر بخير: السلام عليكم.. :وعليكم السلام ناصر: هين بويه؟؟ طاحت فيه أمي: ليش؟هيش مستوي؟؟ أصلا من دخلت وأني اشوف أنك يايب شي من المصايب! قول هيش عندك؟؟؟ ناصر: لا إله إلا الله..وأنتي لازم تعرفي؟؟ أمي: إذا أني متباني أعرف من بيعرف؟؟ ناصر يهز راسه بأنصياع: ميخالف بس تبي لتعرفي..؟ أنزين سمعي! محمودي ولد أختك رافع قضيه... يطلب بنتك هدى لبيت الطاعه!! هيش؟صدق انصدمت,تحطمت.. ماكنت اتخيل محمد بأذيه الوقاحه,, أنسان من دون مشاعر وأني الي كنت متصورته سيد الرمانسيه معقوله يامحمد تبا تسحبني من ايدي الي تعورني لبيتك سحب ؟؟؟ أمي: هيش؟؟ رافع قضيه؟ أنزين يرفع..هدى مب طالعه من هنيه! ناصر: هههه وأنتي بتردي القانون؟؟ هدى: ناصر..يعني إذا طلع القرار(بلعت ريجي) بروح لبيته غصب ناصر بثقه: وريلك فوق راسك هدى: نــــذل.. أنزين ابويه مايجدر يسوي شي؟؟ ناصر رص شفايفه: ميطلع بأيده أي شي! ><><><><><><><><><><><><><><>< ><><>< بعد أسبوعين طبل برا البيت..صوت المسجل شاق الدنيا,, أذيه ترقص ع يساري وأذيه تباركلي..< هيش صاير؟؟؟> معقوله أذيه أني بالفستان الكرزي..؟؟معقوله أذيه أني الجالسه على كنبه بوسط هالجموع كلها..؟؟ معقوله -وبختصار- أذيه عرسي! مب مصدقه أني أكيد أحلم.. مب معقوله الي يصير,,مب معقوله@ أكيد أحلم! "بدت دموعي تنزل من دون محد يلاحظهم..وقلبي يرتعش من دون أحد يدفيه" كرهت أذيه اليوم بمعنى الكلمة.. لا لا كرهت أذيه السنه بكبرهي..صدق كرهتها قربت مني أمي وباستني علي راسي بعدين غطتني.. وقالت بحنان: يسعدك الله..أن شاء الله يله حبيبتي ثوري معي؟ **بصوت خافت: هين؟؟ أمي: بيت ريلك..أقصد بيتك..^_^ **: لا لا مابا مابا والله مابا أمي: هيش متبي؟ تعوذي من بليس وثوري "ثرت معهي بس كل شي فجسمي ينتفض حتى معدتي.. أنزفيت فسياره لبيته كان داخل بيت أهله..دخلوني ولاحسيت بالدقايق الي تمر.. إلا لما حسيت أنه الحجره فضت وهو جالس ألحين قبالي..رفعت عيوني له شفته يتأملني بملامح جامده" بعدين تكلم: مــــبروك أحلام: الــ ـله يـ ـ ــبـــ ـارك فيـ ــ ـك.. "ومازال يتأملني بأذيك النظرات الي تروع.."(أخذ نفس عميق): بدلي ثيابك وتعالي رجدي عقدت حياني*لا لا أذيه أكيد مب صاحي..هيش أذيه الأسلوب الي يكلمني فيه؟؟ هو مايفهم أني عروس يديده..يمكن مغصوب* راشد ثار واقف وفصخ مصره وحطه بالعلاق,,: أقول أشفيه لسانك اليوم؟ أحد كله؟؟ أحلام*هاهاها يضحك..صدق تافه! لحظه تذكرت..أذا راشد يكرهني بعيشة الله,,ليش تزوجني؟؟ خطر ببالي أسأله هالسؤال دام هو رايق*: ممكن اسألك سؤال؟؟ راشد يرفع حيانه..يبتسم بأستهزاء : تفضلي أحلام: دام أنك ماطيقني ليش تزوجتني؟؟ راشد بنظره غريبه: ومن قال أني ماطيقك؟؟؟ أحلام ودمعه ع طرف رمشي: أسلوبك الي يقول! راشد قولي الصدج ليش؟؟ ليش طلبتني؟؟؟ راشد فصخ ثوبه بعدين طالعني بنص عين: لسواد عيونك..ارتحتي "صدج أنسان تافه..وكنت مغشوشه في تحضره..وأسلوبه الراقي! طلع واحد متخلف..مايعرف يتعامل مع الناس بأسلوب.. خذت بجامه نوم من شنطتي ودخلت الحمام عشان أخفي أدموعي الي غرقتني..واندب حظي النحيس الي ربطني فيه" ><><><><><><><><><><><><><><><><>< ><><><>< >< في نفس الليله في أنسانه حزينه تتحضر لمثل يوم أحلام,, بس هنا العكس المعرس كان راح يطير من الفرحه..واهو الوحيد الي حاس أنه هاليوم يوم غير بنسبه له ولها..بس هي حاسه أنه يوم موتها@ وهالفستان الأبيض هو كفنها... هو وعد ناصر أنه يشتري بيت يديد عشان أني حلفت ماأدخل ذاك البيت...وماكذب أخذلي بيت يديد بس وش فايدته إذا الي راح تسكنه من غير روح.؟ وش فايدته إذا كنت عايفه الانسان الي راح يسكنه معي..عايفه شوفته..عايفه حتى أني اسمع صوته.. بس للأسف! أذيه هو يدخل الحجره بكشخته..عسى الدنيا ماتكشخ لك دوم.. قفزت فوق الكرفايه وكأنه شي لدغني وصرت أصرخ عليه: لاتقرب..لاتقرب تراه والله أقتل عمري! محمد يرجع وراء: أن شاء الله أن شاء الله.. بس نزلي وخلينا نتفاهم,, هدى: هين أنزل؟؟ عندك؟ مستحيل.. محمد: هدى الله يهديك هيش أذيه الكلام.. أني ريلك مب ريال غريب! هدى ودموعي تصب صب: ريلي؟؟ ألحين تذكرت أنك ريلي؟؟ محمد الصراحه..أنته ماتستاهل الحب الي حبيتك أياه..أني اكرهك اكرهك (محمد عض شفايفه لين صب منهن دم..بغيت أقفز له وأمسح دمه بطرحتي والمه ولا أهتم لذاك اليوم النحيس.. بس لا..لازم يحس بحرقتي شويه لازم).. هدى بصراخ: طلع برا طلع طلع مابا أشوف ويهك.. أحس بروحي تنتزع لما أشوفك,, طلع(جلست علي ركبي) اهئ اهئ طلع طلع محمد بحزن: من عيوني.. مب مهم نكون فنفس الحجره المهم أحس بقربك.. "فتح الباب وقبل ميطلع قال" هدى.. تراه الدنيا متسوى بدونك < وطلع> ><><><><><><><><><><><><><><><>< ><><><>< شيخه: ماماتي ماماتي.. أمي تخيط ثيابهي: هلا شيخه: ماتبينا نروح بيت الحلم؟؟؟؟ أمي: صبري دقايق وبنروح شيخه: ياالله اماه بسرعه.. ابا أشوف شكلهي كيف صاير.. ابا اعلق عليها,, الله حمـــــــــــــــــــــــــاس أمي تأشر بالمقص: أتشوفي أن يننتي بأختك بقص لسانك قص وبخليك تأكلينه.. شيخه: هههه أن شاء الله أم شيخه..بس عادي ناخذ معنا يماع؟؟ (أمهي بنظرة تهديد) شيخه بضحكه: ههه بس خلاص خلاص..ألحين بتصل لمريم وبخليها تروح معنا! بعد ربع ساعه صارن فبيت أحلام.. أحلام تبكي علي حظهي وأمهي تهديهي من صوب..وخواتهي من صوب.. أحلام*لابسه ثوب زيتوني كشخه..وحاطه ميك اب يجنن وعلي أذيك الجصه عاد محد مثلهي,,الصراحه ماتنلام لماتبكي كل هالجمال وراشد مب عايبنه!* ..................... أمي: جلسي حبيبتي جلسي (جلسنا ع الكنب.. الصراحه بيتهم روعه..سمعنا صوت حنحنه: احم احم) أحلام تمسح دموعهي"طبعا بعد ماتغطينا: دخل راشد "دخل الزعيم وجلس جنب الهانم كنه أسد.. وي معرف كيف أحلام ماتخاف منه": حيا الله عمتي..كيف حالكم؟؟؟ أمي: بخير عيوني كيف أحلام معك؟؟؟ أحلام: امــــــــاه؟؟؟؟ رشد يقرص خدودهي ويحرك حيانه: ههههه عسل عسل.. أحلام"نصـــاب": راشـــــد شيخه: هههههههههههههههههههههههههههههههههههه مريم بهمس: أشفيك يالهبله؟؟ شيخه: أحس أني أشوف مسلسل مب أحلام ورشوود "شفت ويه راشد تغير وكأنه أسمه الدلع ماعيبه..مالت على باله بتهمم!" راشد ألتفت ع أمي: عمتي.. حن باكر بنروح مسقطــ.. أحلام بستغراب: هــــــاا ؟؟؟؟ راشد ببتسامه عذبه: ليش هالاستغراب؟؟ يعني باكر لما بقولك بنروح أيطاليا هيش بتسوي..؟؟ شيخه بستهزاء: أيطاليا مره وحده؟؟؟؟ راشد ألتفت لي بسرعه: اهاا.. ليش مب عايبنك"يقلدني" شيخوه؟؟ أني راشد يابنت عمي(وقال من طرف خشمه) مب سالم ((والحمد لله كان عندي خط دفاع قوي يرد عليه ويبرد قلبي هههه)) مريم بعصبيه واضحه: راشد حن مانسمح على ولد خالنا.. وبعدين هيش فيه سالم؟؟؟ مافيه شي قاصره راشد: أنزين أنزين ماقلنا شي كنت أمزح ومنك السموحه.. "وثار واقف" يله عمتي بخليكن علي راحتكن مع السلامه..وأحلام لاتنسي تجهزي أغراضك! أحلام: أن شاء الله ><><><><><><><><><><><><><><>< ><><>< حطيت كل الي بحتايه فالشنطه..ورحت صوب كبت راشد,, قلت أرتب له أغراضه بما أنه طالع.. فتحته: تظني ياأحلام كل أذيه الاثياب يباها عنده ولأ؟؟؟؟ رحمه: صباح الخير ياعروس! أحلام: صباح النور والسرور رحمه تتلفت بالغرفه: هين معرسنا الغاوي؟؟ أحلام: المعرس ماعنده ذوق خلى العروس وطلع(وكملت ترتيب الاثياب) رحمه: صدق معنده ذوق.. أنتي هيش اتسوي؟؟؟؟ أحلام: أرتب له ثيابه..عشان بنروح مسقط رحمه: طلعتي مب سهله أحلاموه من ثاني يوم بتطلعي معه؟؟ أحلام ألتفت لها: وليش تقولينهي كيه..؟؟حسيت كأني ماشيه أهيت معه مب ماشيه مع ريلي رحمه: ههههه ريلي هههه "مسكت ثوبه وقربته من خشمي وشميته بحركه دراميه..عشان اغيظهي" : ريلي..وروحي وبعد عمري..وش تبي أكثر..؟ فجأه راشد ببتسامه عذبه: تكفيني أذيه الكلمات مابا أكثر.. "التفتت عليه وصار ويهي ألوان..ورحام الهايته طلعت وخلتني بهالموقف البايخ وحدي" أحلام: أنــ ــ ــي كنــ ــ ـت... راشد: أني بدخل اتسبح..خلصي ترتيب وزهبي بنطلع.. الصراحه على قد ماكنت مخيله(خجلانه)منه وخايفه وابا هالموقف يعدي...على قد ماكنت أنتظر منه كلمه حلوه بس وحده..مب عشق فيه بس أني بعدني عروس..حرام عليه الي يسويه فيه@خلاص قررت أعامله بالمثل..يستاهل هو الي بدا والبادي أظلم@" ><><><><><><><><><><><><><><><><><><><><><><><><>< |
جعلاني فعال
غير متواجد
|
"بعد ربع ساعه" جهزت وأنتظرته بالليوان..لأنه حضرته يباله ساعه عشان يتمصر كنه ماشي يغازل..بعد الي يغازلون حشاهم! أخيرا طلع راشد: جاهزهـ؟؟ أحلام (وانا قايمه): اوف..من زمان.."وسرت قدامه" راشد بنص عين: أقول أنتي علي هيش شايفه نفسك؟؟؟ أحلام ببراءه: أني؟؟؟ على جمالي الفتان(وأرفرف بعيوني) راشد بشبح ابتسامه: أنزين ركبي ركبي السياره (سكر الباب البيت وركب) : ها الجميله هيش تبيني أحطلك؟؟ ريمي ولأ الكابتن رابح؟ ناظرته بحيان مرفوع: راشد تستهبل..إذا كنت مطلعني عشان تتهزاء عليــ تراني مسمحلك! راشد: وليش استهبل.. حركاتك توحي أنك ياهله., قلت مب قاصرك غير الرسوم المتحركه! "لفيت للجهة الثانيه لأنه شويه وبذبحه..يغييييظ, -العنز- مصدق عمره ماالت ع حظي" بعد دقايق راشد: أحلام أحلام: ......... راشد: أحلام زعلتي؟؟؟ أحلام: ............. مسك ذقني بحركه مفاجأه ولفني ناحيته: أني ماأحب أعتذر لحد..بس عشان خاطر عيونك الحلوه- أني أسف وحقك عليه... "لا لا أكيد صار لعقله شي..أكيد أذيه مب راشد" (وكمل): بس لايكبر رأسك.. أذيه أول وأخر مره أعتذرلك فيها هههههههههههه "(مالت)نزلت أيده بقوه ولفيت عنه.. حمار مثل يمعوه مايحبو يسوو شي حلو" ><><><><><><><><><><><><><><>< ><><><>< >< ماكان عندي شي اغلى من الروح ولاكنت احب احد ٍ كثر حب روحي كنت احسب ان الروح مابعدها روح ولافيه روح احبها كثر روحي وعرفت ان الروح ترخص لاجل روح روح ٍِ غلاها زاد عن حب روحي.. عدو هاليومين على خير..صرت ماأشوفه إلا بالصدفه,, بس اليوم من الصبح ماشفته فالبيت.. طلعت بالليون وفتحت التلفزيون وقلبت بهالقنوات وفجأه سمعت صوت مسج فجوالي فتحته.. (وجه النحس) " حطيت لج ميرندا عند باب الليون -أعرفج تحبيه-" هدى: ههههههه لذيه الدرجه يظن أني ياهله؟؟ يي مسج ثاني (وجه النحس) "لا تخافي أني مب برا.. لاتخليه يحر عليج" هدى: نزين يامحمد..أني الي بيننبك! طلعت برا وخذت معي سكين وبطيتبها علبة الميرندا وكتبت جنبها "أكـــرهــــــــــــك" ><><><><><><><><><><><><><><>< ><><><>< >< أحلام: راشد.. راشد: هاا أحلام أقضم أظافري: لاتقول ياهله, بس أني مجدر أوصل مسقط بدون مدخل القرم؟؟ راشد انفجر فجأه: هههـــــــهههههههههههههههههههههههههه تصدقي ذكرتيني بموقف هههههههههههههه هههههه أحلام: لذيه درجه يضحك يعني؟؟أنزين ضحكني معك راشد: الله يسلمك ذكرتينني بموقف خبرني به حمد لما كان صغير كان مرسول بيت عمتي- الله يحرمهي- ويوم يي يبا يطلع من بيت مدت عليه عمتي 200بيسه.. ههههه وأهنيه حمد بغي يسوي فيها عمره عود ومستحي,,قال لها: لا لا مابا مابا,وركض علي باب وبعد ماطلع تلي خاطره..أني ليش قلت لا ليش؟؟ ههههههههه أحلام: هههه وبعدين هيش سويء؟؟ راشد يرجع راسه لورى شويه: ههههه رجع وقاللهي: عمتي عمتي: ياعونك حمد: لاتقولي عني ياهل بس أني أباهن200 أحلام بعصبيه: وألحين أنته تشبهني بحمد الهبل..؟؟ راشد: تراك هبله مثله أحلام بعصبيه: راشــــــــد راشد: خلاص سكرنا السالفه وألحين تبيها الحديقه ولأ لا؟؟ أحلام:sure خذني الحديقه ومابقيت لعبه مالعبتهي كني ياهل..بعدين روحنا نتعشا وعلى حدود ساعه 12 مشينا صوب الفندق.. راشد تمدد ع الكنبه واني دخلت أتسبح..لما طلعت لقيته مغير ثوبه وجالس يتمصر..ياربي أذيه هين يبا يروح ألحين؟ أحلام بحيره: راشد راشد: هاا أحلام: هين ماشي؟؟ صارت الساعه جريب الوحده. رفع حيان واحد: ليكون أنتي الريال وأني معرف؟ أحلام: يعني لازم أكون ريال عشان أسألك هين مروح؟ يعني الحرمه مالها رب تسأل؟؟ بعدين أني كنت خايفه علي عمري مب عليك! راشد: حشى..تبي لسبب عشان تمدي لسانك؟! أحلام مفوره ع الآخر:.......... راشد جرب مني وايد وقال بنبره غامضه: ألحين أنتي ليش معصبه؟؟ أحلام بضيق:ليش معصبه؟؟ صح هيش يخليني معصبه؟ أني هبله أعصب ع كل شي؟؟ راشد: هههههههههههه تصدقي؟ تضحكيني لما تعصبي. أحلام بعصبيه: أنزين خليني كل ساعه أعصب عشان حضرت جنابك تضحك أوكيه؟ راشد فجأه وبدون مقدمات جرب أكثر مني وطبع بوسه علي يبهتي خلت كل جسمي يرتعش ودمي يفور ياربي هيش أذيه الأنسان؟؟ بلحظه يغير مزاجه.. وبلحظه يحسسني أني شي بحياته ومع أني ولأشي بدنيته! مجرد بنت عم حكم عليه أبوه يربط مصيره بمصيرها. راشد ببتسامه جذابه: خلاص حقك عليه.. أني ألحين بطلع ألاقي واحد من ربيعي قفلي باب شقه ورجدي لأنه يمكن أتأخر! أوكيه؟ (وبلحظه شفته جريب من الباب) راشد: أحلام..لاتأخذي بخاطرك عليه أنزين<وطلع> ><><><><><><><><><><><><><><><><>< ><><><>< ><>< صارت ساعه3 صبح وراشد بعده مارد..أني ماياني رجاد,تميت خايفه وأتخيل أشياء تخوف وكل ماأسمع صوت شي فزيت واقفه.. صار قلبي يدق يدق حاسه أنه بيطلع من ضلوعي.. الله يسامحك ياراشد تعرف أني خوافه.. طلعت بصاله وشغلت تلفزيون جلست ع الكنبه وخليت ريولي بصدري..وأندمجت مع الفلم. فجأه رن جوالي..ماتشوفو كيف جسمي رجف وشكلي كيف صار.. أحلام : حمار خوفتني(رفعته..كنت أظنه راشد بس أذيه رقم غريب..لحته جنبي) مب قاصرني غير أنته ألحين تفرلي مخي.. يله غيب عني! ودق مره وثانتين وثلاث...لين طفح الكيل عندي وطفيت التيلفون كله. فايجه أني ألحين..أني الي هامني ألحين هالريال الي عندي لين ألحين مارد..كنه ماعنده حرمه منقعه فالفندق وحدها..مـــــالــــــــــت ><><><><><><><><><><><><><><><><><><><><><><><> يا رفيق القلب ما صدق أنك نسيت خابرك مهما تعذبني حنون لاذكرت ايامك الحلوه بكيت ماتهون ايام ودك ماتهون راحتي وياك لامنك صفيت في ثواني كلها بوح وشجون لاتهنيت بتعذيبي وانتهيت ودي اعرف في حياتك من اكون؟ صارله من ساعه 9 يشوف التلفزون مامل؟ أني رجدت وشبعت رجاد وهو بعده يقلب بهالقنوات؟ مب معقوله مارجد لين ألحين! بأطلع اشوفه راجد ولأ لا؟ لا لا يمكن مارجد،،،هيش بيقول عني غير أني مهتمه به! لا مابا << ياربي مليت وماياني رجاد...أووووووووف بطلع وأمري لله إذا شافني بخلي عمري ادور ماي ~_^ و إذا كان راجد بستغل الفرصه وبشوف فلم<<< ترا محمد راسه ثقيل صعب يثور مستحيل يحس فيه_ تسحبت شوي شوي وطليت عليه من وراه كان فسابع نومه إلا فتاسع نومه.. حطيت صبعي ع عينه حتى اتأكد..ماتحرك أكيد راجد((((فرصه))))) نقصت صوت التلفزون وحطيت Mbc2 كان الفلم روعه بس كنت متوتره شويه واشوف عليه...بس بعد دقايق اندمجت فالأحداث ولأ حسيت بدنيا من حولي . . . . . . . . وسط اندماجي حسيت بذراع دافيه طوقني من ورا..وقف شعر رأسي وصار جسمي كله يرتجف..جرب من أذني وهمس بصوت خافت مليان حب وشوق محمد: والله أحبك..وأذوووووووووووب فيك..ولأ أقدر اعيش من دونك.. هدى(لاتبدي ولأ حركه وكنه شي جمدها كأنه جسمها انشل): ............... محمد(أخذ نفس عميق وهو يقرب من عنقها..وكأنه يبا يشبع روحه من ريحتها ): مشتــاقــلك...مشتاقــلك موووت.. "وطبع بوسه -دافيه حنونه اتعبها الشوق- على عنقها~غمضت عيونها بقووه حست دنيا دوربهي تبا تهرب بس جسمها ما ساعدها" محمد يضمها أكثر: كنت حاس فيك بس ماتحركت...تعرفي هيش صار فيه لما حسيت بنعومة اصبعك بعيني؟؟ حسيت بأنه دنيا ردت تضحكلي من يديد.. هدى لاتكابر! أنتي تحبيني..أنتي تحبيني ياهدى.. "ماقدرت اتحمل..أحس شي داخلي يقولي *لازم ابعد عنه، لازم احطمه مثل ماحطمني..مهما صار ياهدى هو هانك مستحيل تنصاعيله بهالسهوله مستحيل تخليه يجرك بكم كلمه مستحيل(((مستحيـــــــل)))* " بحركه سريعه دفعته عني ووقفت جدامه وأني اصرخ: أني ماحبك أكرهك..أفهم ماعاد لك بقلبي مكان..أنته مجرد ماضي له.. وقف جدامي وعيونه تحمل ألف معنى،،بلع ريقه،،: هدى خلاص تعبت من كثر ماأحاول ارضيك هيش تبي أكثر من كيه؟ هدى: ماقلت لك حاول..أصلا من البدايه قايلتلك م ا ح ب ك.. افــهــــمــ محمد فاتح عيونه ع الأخر: حبيبتي أنسي الماضي ورجعي هدى الي اعرفها.. هدى: محمد أنته حطمتني..هنتني جدامها(عضت ع شفايفها) وأنت تعرف اشكثر حن نكره بعض وكل وحده تبا تكسر عود الثانيه (ودموعها أربع أربع) فنهايه ييت أنته وكسرتني فتات جدامهي..بكل سهوله وقسوه! كرهتك محمد أكرهك.. (غطيت ويهي بكفيني) محمد "بعصبيه": خلاص هدى تحملت منك وايد..تراه وصلت عندي لين هنيه ( ويأشر ع خشمه) والريال يدوس على أي شي عشان كرامته.. كرامتي فوق كل شي..كل شي يهون عشانها هدى ضحكت بستهزاء: كرامتك؟ هينها كرامتك يوم اقولك ماباك وانته معزم غير تتزوجني.. هين كرامتك يوم تركض ورا حرمه تكرهك هينها الكرامه الي تتكلم عنها؟هينها؟؟ محمد وروحه تقطع بس مابان هالشي بصوته الغاضب: هـــــــدى..تراك زودتيها هدى قلبي راح يظل يحبك بس عيني تتعذر شوفك... عيني تتعذر شوفك عيني تتعذر شوفك أنتي طالــــــــــــــق هدى ((((طالـــــــق))) |
عضو شرف
غير متواجد
|
واااااااااااااااااااااااااااااااااااااو
والله روووووووووووووووووعه شوي وبصيح الا دمعت حبيت احلام وهدى وايد وحزنت على سالم لما تزوج شيخوه مع ان احلام تحبه وكرهت سالمه و........و...........و.., نتريا التكمله ياريت تعجليها الرواية
|
خَ'ـفـآيآ آلـ ـرُّـوـح |
مشاهدة ملفه الشخصي |
إرسال رسالة خاصة إلى خَ'ـفـآيآ آلـ ـرُّـوـح |
البحث عن كل مشاركات خَ'ـفـآيآ آلـ ـرُّـوـح |
خَ'ـفـآيآ آلـ ـرُّـوـح |
مشاهدة ملفه الشخصي |
إرسال رسالة خاصة إلى خَ'ـفـآيآ آلـ ـرُّـوـح |
البحث عن كل مشاركات خَ'ـفـآيآ آلـ ـرُّـوـح |
جعلاني فعال
غير متواجد
|
الصرااااااااااااحه روووووعه ونبي التكمله بليييييييييييييييييييييييييز
بلييييييييييييييييييييييييييييييييييييييييز
|
انواع عرض الموضوع |
الانتقال إلى العرض العادي |
العرض المتطور |
الانتقال إلى العرض الشجري |
|
|