لي خافق - الصفحة 2



بسم الله الرحمن الرحيم

السلام عليكم ورحمة الله وبركاته

قال محمد بن فطيس:

بعض العـــرب حبـــه يوردك الجنون
ولا يوصـــف لتـه غــلاك حـــكاك له

ما يقنعه وصـف الغلا لو وش يكون
لو كل حــــرف(ن) بالحرير يحاك له

الموت جــاك وهـــو تقلبــه الظنون
ولا لك إلا ّ الصـــبر وش وداك لـــه

وأنا أعجبتني القافيه كثيرا ً ، فقمت بكتابة قصيدة مشابهه
لقافية أبيات أبن فطيس ، فقلت:

لي خافق(ن) غرقان ما بين الطعون
وهمــــوم وقتـــه تحتويــــه وتاكلــه

لا زاد وجده عشعشت فيــه الشجون
وشلون يبرا مـــــــــــن ألم جفواك له

رغم الوفا جـــــــــــازيت حبه بالظنون
وين المحبه والغــــــــــــــلا ووفاك له

قلب(ن) معك دايم رغــم صدّك حنون
ولا ضاق بك وقتك تـــــرى شكواك له

يرضيك ولـــــــــو كلّ الخلايق يزعلون
معقول هجرك هـــــــو يكون جزاك له

ساعه يجي عاشـــق ويملاه الجنون
وساعه يجي مقهور مـــن طعناك له

يرعاك من كيـــــــــد العواذل والعيون
ويدعي إله(ن) جمّلك يرعـــــــــاك له

يغليك وماغيرك معه شخص(ن) يمون
ولو كان طيبك للمــــــــلا وقسواك له

حبك نبت فــــــي داخله ورد وغصون
وما غير وجهك يسّحــره وضحكاك له

لو كلّ هالعالم يخونوا مـــــــــــايخون
ياليت تفتح بالوفـــــــــــــــا يمناك له

ردّ الوفا دام الغـــــــــدر طبع السنون
واللي سعى لك...زيد في مسعاك له

المشكله قلبي تـــــــرى كله طعون
وهموم وقتــــــــــــــه تحتويه وتاكله

وإنته تزيده بالجفــــــــا وجد وشجون
وشلون يبرا مــــــــــن ألم جفواك له

أحمد العلوي

للإستماع للقصيده إضغط على الرابط
http://up.ftahilah.com/up//download.php?filename=2d84e60823.mp3

حسابٌ واحد لجميع خدماتنا !