السلام عليكم شباب
اخباركم عساكم بخير
حيالله بالحلوين
في احدى دورياتنا الليله والتي تكون عاده في احد المجمعات او الشاطي او شارع الحب اوالحاره او او او
لكن هذي المره كانت بالجبل القريب من بيوتنا والذي يذكرنا ببيئه بلادنا الصحراويه والجو الجميل( الكووس)
جلسنا نتحاور في احدى قضايانا والتي عده ما نفشل في حلها
وقد يرجع السبب الى عدم استعدادنا لذلك لان حل تلك المشكله او القضيه يحتاج الى بعض التضحيات ويحتاج الى التخلي عن الكثييير
ونحن نسولف انا وراعي الفزعه كاسترو حدث الاتي:
كاسترو:متى بيجي اليوم اللي بتتحرر فيه فلسطين؟؟!
ظبي: هع انت مسخن ولا شو ؟؟!! اخوي الشيمه اسكت لا تتكلم بهذا الموضوع
كاسترو : لا .. اقولك ويش رايك نحاول ان نتكلم بمواضيع سياسيه؟
ظبي: ومن متى نحن نهتم؟؟!!
كاسترو: هههههه من الحين
شوف نحن ويش ينقصنا عشان نحرر فلسطين؟؟
ظبي: مدري؟؟ يمكن اسلحه؟؟!
كاسترو:لا يا الذكي قصدي معنويا
ظبي: انت اكيد مسخن
كاسترو: ود الحلال ركز معي شوي
ظبي: انزين ..شوف انت قبل ما تحرر شي حرر نفسك!!
كاسترو: كيف هات اللي عندك؟؟!!
ظبي: هع افتح تلفونك كله ارقام بنات!! روح بيتكم وافتح التلفزيون ..كله قنوات اغاني وافلام ....
اطلع من بيتكم وروح لربعك ..كلهم صياع او على الاقل ما مهتمين بالصلاه او مقصرين بها وكله تفكيرهم بالمطعم الجديد المفتوح والفلم الجديد النازل بالسينما
وارجع من ربعك وروح المدرسه (اذا كنت طالب) وشوف المقررات اوين ثقافه اسلاميه والمدرسين كل همهم بالسياره الجديده اللي بيشتريها ولا متى بيخلص الدوام عشان يرتاح من هالصدعه
واطلع من المدرسه وامشي فالشارع وبتحصل ...
كاسترو: لحظه لحظه انت تبا تحرر فلسطين ولا شو
ويش تخرف ؟؟!!
ظبي: انزين انت قولي كيف!!
كاسترو: هذي مشكلتنا نحن العرب ...ما نشغل عقولنا
ظبي : اوكيه شغل عقلك وراويني..
كاسترو: نروح اسرائيل ونخلي عمرنا سياح ..
ظبي: يالذكي صعب تدخل اسرائيل لانك عربي؟؟!!!
كاسترو: اخوي الحين كله واسطه!!
ظبي: ههههههههه وانت الصادج
كاسترو: انزين ونتعرف على بنات هوامير هناك ونجلس كل يوم نعسلهن بالكلام الحلووبعدين نتطور ونتعرف على بنات سياسيين..
ظبي: خيبه!!!!
كاسترو: انت اسمع ..وشوي شوي ونتزوج بنت رئسيهم..
ظبي : اش دعوه بيموتن عليك!!!
كاسترو: افا .. انا كاسترو ابو فزعه ..اطيحهن ونص
المهم وبعدين طبعا ابو الحرمه بيشيب وبيموت محد ما يموت صح؟؟
وبعدين انا بصير الرئيس!!!!
ظبي: اسميك ذيب
كاسترو: هع ذيب وبس الا ذيب ونص
ظبي :انزين خبر اهلك انك بتروح اسرائييل ....(تلفون كاسترو يرن)
كاسترو: الووو ايوه ........ اوكيه مع السلامه
كاسترو : ينعلها من حاله!!!
ظبي : هااه خير؟؟!!
كاسترو: الوالد موصني من المغرب اجيب له حاجه من الدكان والحين اتصل ويقولي وييينك؟؟؟!!!
كاسترو: يالله رايحين بروح البيت بسرررررررررعه
ظبي: وفلسطين ؟؟؟!!
كاسترو: سييييييررررر أي فلسطين واي خرابيط
الله يستر ويش بيسوي ابوي فييه!!!!

:d :d :d

ويش رايكم؟؟
هل تعتقدوا انه نقدر نحرر فلسطين انا وظبي؟؟:d