الله لنا ياللي نسى وصل الاحباب .. تنسى واحنا للغلا ما نسينا

بدّلت ذاك الحب في هجر وغياب .. من علمك تنسى وتقسى علينا

كنا سوى يوم الهوى بيننا طاب .. والحب كان بصدق موجود فينا

لا نسمع العاذل ولا نعرف عتاب .. واحلى الليالي كلها لا التقينا

واليوم صرنا نلتقي مثل الاغراب .. من عقب ما كانت تعانق يدينا

للكل منا طبع والطبع غلاب .. نسيت ماضينا وحنا وفينا

تصبح وتمسي وترقد دون تسمعني .. عودت قلبك على هجري ونسياني
انت تعمدت بغيابك تقاطعني .. وانت تسببت في همي واحزاني
صبرت بس الصبر ما كان ينفعني .. مليت ومل انتظاري وبُعدك اشقاني
يا ما تمنيت شوفك وانت تمنعني .. وانت تجاهلت احاسيس و وجداني
لا تعتذر فالعذر ما عاد يقنعني .. من عقب ما ذقت من صد وحرماني
انا اتحداك اذا تقدر ترجعني .. او انت تقدر على بُعدي وهجراني
ما عاد لك أي دافع شوق يدفعني .. من عقب ما انت تبيع بارخص اثماني
بالحيل عانيت من بُعدك ولوّعني .. جرّب عذاب الفراق ويمكن تعاني
لا .. لا تحاول وابعد روح طاوعني .. ولا تفكر انك تعود لدنيتي ثاني
ما عاد حبك ولا شوفك يولّعني .. انا نسيتك واطلب منك تنساني