مشكووووووووووووورة

~ô§ô~كبريــاء انـثى~ô§ô~
ღღღღღالجزء السادسღღღღღ
~ô§ô~كبريــاء انـثى~ô§ô~

حمد من بند عن صالح زاد من سرعته... لين ماوصل للمقهى ودق على صالح انه وصل... يا صالح وركب السيارة
صالح: خير هيش هناك؟
حمد: انت سكر الباب
صالح سكر الباب... وحمد حرك سيارته بسرعه... صالح مستغرب من تصرفات اخوه وقال: انت مب تقول لي هيش فيك؟؟
حمد: اباك ف موضوع... بس خلينا نوصل مكان هادي ونتكلم

وقف حمد ف مكان بعيد عن الازعاج... ونزلو من السيارة.. ووقفو جنب السيارة
صالح: هيش هناك؟
حمد بعصبية: ابوك... ابوك
صالح مستغرب: هيش فيه ابوي؟
حمد: يباني اخذ بنت عمك بالغصب
صالح بدأ يستوعب: وانت ماتباها؟؟
حمد ارتاح شوي: اها... ماباها.. يبو يغصبوني
صالح: بس هم متكلمين من زمان انهم يبو اسما لك
حمد عصب مرة ثانية: بالغصصصصصصب؟؟؟؟
صالح بهدوءه المعتاد: لا ماشي غصب... انت هيش قلت لابويه؟

حمد خبر صالح بكل اللي صار مع ابوه... صالح فهم الموضوع... وعرف سبب ضيق اخوه...قال: تراه ابويه ماقال اذيه الكلام الا عشان كلمته قدام عمي
حمد: واني قلتلهم يخطبوها لي؟؟.. بس كيه...منيه والدرب يخطبو بدون مايشاورونا
صالح: عذرهم... تراهم على تفكيرهم الزماني... أن الولد له بنت عمه
حمد: انزين هم يرضيهم اخذها وبعدين اطلقها... ولا اتزوج عليها؟؟
صالح تذكر مأساته مع بنت عمته ورد بحزن: لا مايرضيهم.... وانت ليش رافض اسما؟
حمد: ياخي ماباها وبس... اعتبرها مثل مريم
صالح: ومن تبا؟؟
حمد ارتاح لتفاعل صالح معه وتفهمه: ندى اخت سالم
صالح: اهااه... تحبها؟؟
حمد تضايق من سؤال صالح: مب سالفة احبها... بس داخله مزاجي... ومرتاح لها
صالح: انزييييييين...وبنت عمك؟؟ (وهو يفكر ف حل لاخوه)
حمد بتخوف: عندي الحل
صالح باهتمام: هيش هو؟
حمد بارتباك: انك تاخذها
صالح كانه ياته صفعة على ويهه: نععععععععععععععععععم؟؟؟ (ومسك حمد من ثوبه من رقبته) هيييش تقوووووول؟؟؟!!!!!
حمد دز اخوه بعيد عنه: فللللللللللتني
ابتعد صالح عن حمد...وتكلم بعصبية: انت ينيت؟؟؟ تبا تتخلص من مشكلتك وتعقها عليه؟
حمد: انزين ليش ماتاخذها؟؟
صالح بعصبية: حمد لاتخليني ادفنك هنيه... تسمعني.... وياويلك اسمعك تذكر السالفة اذيه قدامي
حمد مستغرب من ردة فعله: صالح هيش فيك؟؟ اني ماقلت شي غلط ولا حرام
صالح: اقولك سكت.... ويالله حرك السيارة (وراح ركب السيارة وسكر الباب بالقوة)

حمد تم ف مكانه... وهو بروحه معصب... ماكان يتوقع تكون ردة فعل اخوه كذيه!!... كان يباه يساعده وشاف رده
صالح معصب حده: بتي تحرك السيارة ولا تباني امشي بريولي؟؟
ركب حمد السيارة... وحرك السيارة... وعم الهدوء السيارة... كلن يفكر على صوب... ولاتكلمو لين ماوصل صالح للمقهى وهبط عنه... وكمل حمد دربه


ف بيت ناصر.... محمد يتابع التلفزيون فلم اجنبي على mbc2 ... ويدق على حمد بس يحصله مغلق...مستغرب من ربيعه هيش فيه مسكر التلفون؟؟ مع انه قايل بيمر عليه الساعه9...والحين الساعة عدت ال10... وياه مسج من ندى تقول:

" ياطير
وصل "سلامي"
لصاحب
اجهل
علومه
قله
تراك "غالي"
واللي
يعزك
لا تلومه "

محمد دق قلبه وقال فديتك يالغالية ورد عليها:

"هلا
باللي
تملكني
واغلى
من سكن قلبي
هلا
باللي
احبه
وصار
دربه ف الهوى دربي
هلا بك
يافرح عيني
هلا بك
يا امل حياتي
هلا
بالذوق
والحنان
هلا بك
يا اعز انسان

يسعد مساك حبيبتي،، "

يات اسما وقعدت جنب اخوها: محمد غير القناة... الحين اتابع اوبرا ف 4
محمد: تراني قاعد اتابع الفلم... خلاص اندمجت معه
اسما تترجا اخوها: بلييييييييييييييز محمد... غير
محمد: مابا اغير... مشي المجلس تابعي من هناك
اسما: لا والله... الحين اني امشي هناك؟؟

محمد ياته رسالة من ندى:
" الله يمسيك بالخير ولد خالي"
محمد رد على ندى:
" ولد خالي بس!!
ماشي حبيبي عمري حياتي حبي
ولا ماستاهل؟؟ "

اسما استغلت انشغال اخوها بالتلفون وسرقت الريموت وبدلت القناة... وحطت برنامج اوبرا
محمد شاف القناة تغيرت: اسووووووووم ييبي الريموت
اسما: تراك منشغل بالتلفون... ماجالس تتابع... حبيبي حمودي خليني اتابع على راحتي

وصاح تلفون محمد يعلن عن وصول مسج...
وكانت ندى تقول:
"تستاهل واكثر
بس تعرفني مستحيل اقولها الحين
خليها لبعدين"

ورد عليها محمد:
" على راحتك حبيبتي
الله يقرب هاليوم اللي تكوني فيه حلالي"

وفكر محمد... لازم اكلم ابويه عشان يخطب لي ندى... اخاف تروح من ايدي... بس اخاف ابويه يقول امك حتى مالها 5شهور وانت تبا تخطب وتعرس... الله يرحمك ياامي... كنتي تتمني اليوم اللي اعرس فيه... بس سبحان الله الموت كان اقرب لك منا
واتصل بخدمة اهداء الاغاني وطلب اغنية محمد عبده "ايووه" للشاعر دايم السيف (خالد الفيصل)... وطرش لها مع كلمة "احبك"

رن تلفون ندى وشافت رقم غريب وردت وسمعت صوت محمد يقول: "احبببببك" وبعدين تسمع موسيقى لاغنية مب غريبة عليها... وبدى محمد عبده:

" ايوووه قلبى عليك التاع
مايحتمل غيبتك ليله

وعساه عساه مايرتاع
عليك يانافل ٍ جيله

لبيه يابو عيون وساع
ماغيرك أحد ألبي له

معذور لو صرت بك طماع
من حبكم مالنا حيله

القلب من يمكم نزاع
لوحاولو صعب تحويله

مانيب من عاذلى سماع
والله ماقطع مواصيله

من لام راعى الهوى خداع
سيور الايام تبدى له

ماضاع عمرى معك لو ضاع
مانوح لالا واغني له

سلمت لك خافق ٍ جزاع
عساك يازين تاوي له "

وخلصت الاغنية....ندى كانت مندمجة مع الاغنية اللي تحبها... وتقول كيف عرفت يامحمد بحبي لهالاغنية؟؟ القلوب مع بعضها!!
وطلبت له اغنية عبدالمجيد "تنتظر كلمة احبك"
محمد سمع الاتصال ولما شاف الرقم توقعها ندى مطرشة له... وياه التعريف بالرقم وبعدين سمع اغنية عبدالمجيد:

" تنتظر كلمة احبك شايفك مشغول فيها
كل شي بوقته حلو وليه مستعجل عليها
بكره هي اللي تجيك وتمر كل لحظه عليك
انت بس طولي بالك وكل شي بوقته حلو

في ثواني وفي دقايق في شهر والا سنه
القلوب هي اللي تحكم ماهو انت او انا
ينولد حبك وحبي واعشقك يانبض قلبي
انت بس طولي بالك وكل شي بوقته حلو

خلنا نفهم بعضنا قبل مانهوى ونضيع
مابعد برد الشتاء الا نسمات الربيع
اوعدك كلمة احبك منها مايمل قلبك
انت بس طولي بالك وكل شي بوقته حلو "

ابتسم محمد لما سمع الاغنية وقال والللللللللللللللللله احببببببببببببببببببببببببك ياندى
اسما مستغربة من ابتسامة اخوها: اقولك انت من تغازل هناك؟؟ والابتسامة اذيه لمن؟
محمد انتبه لحاله: هااااه.... وانتي هيش خصك؟؟
اسما زعلت من كلمته: اسفة اذا تدخلت ف خصوصياتك
محمد عاتب نفسه ليش رد اذاك الرد على اخته: اسوم مب قصدي... حقك علي
اسما تتغلى على اخوها: بس خلاص.... اني زعلت... ولاتهاريني
محمد: يؤيؤ يا اسوم زعلتي؟.... هيش رايك برضوة؟
اسما فرحت وخاطرها تطلع برى بيتهم: بروحي اختار
محمد: امري وتدللي
اسما: تطلعني الحين وتعشيني وتمشيني
محمد: هههههههه....اذيه ثلاث طلبات مب وحده!!
اسما: وبعد طلب رابع
محمد: هيش هو؟
اسما: تشلني باكر بيت عمي محمد عشان مشتاقة الريم
محمد باستغراب: من الريم؟؟
اسما: الريم... مريم بنت عمي... اني ادلعها الريم
محمد: والله وتعرفي تدلعي... هههههههه
اسما تغمز لاخوها: اعجبك حمودي
محمد: ههههههه... انزين يالله قومي هاتي عباتك... وخبري ابويه أن بنطلع
اسما وهي قايمة: من عيوني يا احلى واجمل و اوسم اخ
محمد: كل اذييييييييييييييه؟؟ لعاد كل يوم بطلعك عشان تتغزلي فيه
اسما: انت بس طلعني وبتسمع العحب العجاب
محمد: ههههههههههه

وراحت مريم تتلبس وخبرت ابوها انها بتطلع مع محمد... واذا بيطلع معهم؟... بس ناصر قال لها انه تعبان ويبا يرجد وتروح تتمشي مع اخوها وتغير جو

محمد لما راحت عنه مريم...راح ينتظرها ف سيارته... ومسك تلفونه وطرش اغنية ثانية لندى... محمد عبده "اميرة الورد" وقال لها: "امووووووووووووووووت فيك ياندويتي"
وسمعت ندى الاغنية:

" اميرة الورد ليه الورد مفتونك؟!
ليه بحياته يحاول يشبه الوانك؟!

كم من فراشة تمنت تلمس غصونك؟
والورد ياما تمنى يعيش باغصانك

اذا ابتسمتي يذوب السكر بلونك
ويزور شهد الحياة قلوب خلانك

والليل يغفي ويصحى بس ف عيونك
والصبح خدك ونور الشمس عنوانك

ياغنوة الحب ليه دايم يغنونك؟
كل القلوب بغلاها صاغت الحانك

وانا بودي اكون السعد في كونك
واكون غنوة تغنى بس علشانك "

ندى كانت منسدحة على كرفايتها وهي تسمع... تحس عمرها بعالم ثاني... عالمها هي ومحمد بس.. عالم حالم رومانسي...ماتتخيل نفسها تكون لغيره... وقالت والله اموت فيك يامحمد اموووووت فيك
سمعت امها تناديها من برى حجرتها: ندى تعالي
ندى: ان شاء الله ماه
وطرشت لمحمد:
"بسسسسس
والله استحي
بروح عند عمتك تناديني
باااااااي"

ويات اسما وركبت السيارة وشافت اخوها سرحان: بوووووه... اللي واخد عقلك يتهنا به
محمد بكل شاعرية: اميييييييييييييين
اسما مستغربة من تصرفات اخوها: انت اليوم مب طبيعي!!
محمد انتبه: هاااااااااه... ههههههههه... اليوم الرومانسية زايدة عندي بس
اسما تبتسم: احلى رومانسية... ياحظها اللي بتاخذك يامحمد (قصدها مريم)
محمد يمسك ياقة ثوبه: احم احم....ولد ناصر بن صالح... اكيد ياحظها
اسما: هههههههه... يالله تحررررررررررك....ولا اذيه التمشية؟!!
محمد: هههههههه... خلى انزين وحرك محمد السيارة وشغل الاف ام وكانت اغنية عبد المجيد "تنتظر كلمة احبك"....ابتسم محمد وقال يالصدفة!! فديتك ياندى... وتم يدندن مع الاغنية

************************************************** *****

************************************************** *****

ف شوراع جعلان...حمد بعده يدور بسيارته... ومايعرف عمره هين بيمشي؟؟ ...مبند تلفونه ماله بارض ف شي... يدور على حل لمشكلته بس ما لاقي...وقال خليني اروح اصيلة ابا اجلس عالبحر وحدي

صالح اول ماراح عنه محمد...ركب سيارته وراح بيتهم سيده... دخل وكان متنسف مصره على كتفه.... لقى امه ومريم يتابعن التلفزيون... وكان شكله متضايق حده وبدون نفس قال: السلام عليكم
مريم وامها: وعليكم السلام والرحمة
عايشه: هيش فيك ابويه..تعبان؟؟
صالح يمرر ايده على ويهه: شويه... حمد مايا هنيه؟؟
عايشه: لا... من عد طلعته مارد
صالح: وابويه؟؟
عايشه: ابوك مشي يرجد
صالح: اهاااه
مريم: صلللوحي
صالح: هيش هناك؟؟ وراها شي آالصلوحي
مريم: هههههه... محد كثرك فاهمني
صالح: هيش تبي؟
مريم: خلى بتكشتنا اني وامي
صالح: كشتة الحين؟؟؟...تراك اليوم يايه الدار...واحيتي تملي من البيت؟!!
مريم: بنغير جو لمامي
عايشه: روحي برية منك... ابا امشي ارجد...مابا شي من التكشيته الحين
مريم: ماه خليني اسالج على عمري
صالح بطفش: مالي بارض طلعة الحين
مريم بترجي: بليييييييييييييز صلوحي...والله مشتاقة ادور ف جعلان
صالح: باكر بكشتك... والله اليوم تعبان ومالي بارض
عايشه بحنية: خلي اخوك على راحته... بويه مشي ارتاح
مريم: وعد انك تكشتني باكر
صالح: وعد... اني بقوم ارجد كان بييني رجاد
عايشه: الله يحفظك
مريم: تصبح على خير صلوحي.... واحلام وردية (وتغمز لاخوها)
صالح وهو قايم يقول ف خاطره أي وردية؟؟ قولي هموم : وانتي من اهل الخير

وراح صالح غرفته...دخل الغرفة وسكر الباب... عق المصر وفصخ ثوبه وبقي على وزار وفالينة... وعق عمره على الكرفاية وهو يفكر ف اخوه... يقول حرام ينظلم وينجبر على شي مايباه... وبنفس الوقت مايصير يخلي بنت عمي ويرفضها... هيش بيقولو الناس؟؟ اكيد عايب عليها شي... وعمي بيزعل علينا... وابويه اكيد مابيرضي نحط بيت عمي فهالموقف... يارررررربي هيش الحل؟؟...وتذكر كلام اخوه لما يقول: عندي الحل.... بس اني مابا اتزوج الحين... نوره سدت نفسي عن الزواج...صحيح اني كنت ماخذنها عن اقتناع بس ماكنت متوقع شخصيتها شينة لاذيك الدرجة وهي بنت عمتي شيخة الطيبة.. غبية وماتحب الا نفسها وكل طلباتها اوامر ولازم تتنفذ..من اول يوم ف زواجنا مارتحت معها.. وتميت معها بالغصب احتراما لاهلها... بس ماويبتني ولا ويبت هلي... وماتعدلت بالعكس زاد جورها وغرورها تسحبني ميت عليها!!!...عمري ماسمعت كلمة طيبة منها...عمري ماتهنيت بيوم واحد معها وحسيت اني متزوج حالي حال غيري... دوم نزاعات وتطليبة وزعل.... وعمري ماراح انسى اذاك الموقف...وتذكر قبل 3 سنين اللي صار وكان سبب الطلاق

( كان راد من الشغل تعبان... وسمع صراخ ونزاعة بين مريم ونوره من برى
ودخل عليهن: بسسسسسسسسسس... هيش فيكن تصرخن كيه؟؟ صوتكن طالع برى؟؟ ماتقولن عندنا يران ولا شي؟... ماتعرفن الاصول ولا الادب؟؟
مريم تكلم اخوها بعصبية: والله ادب حرمتك قبل
صالح انصدم من الكلمة وصرخ على اخته: مرييييييييييييييييييم.... عيييييييييييييب
نوره وبدموعها المزيفة: شفت اني مظلومة فآالبيت... ويوم اقولك ماتصدقني ( وبكت...وراحت تركض لحجرتها...اونها تباه يلحقها)
صالح بعصبية: هيش صاير؟؟ وهيش فيكن تنازعن؟
مريم بضيق وعصبية: حرمتك ياصالح... منازعة امي قبل شوي ودفرتها على الارض
صالح مب مصدق: هييييييييييييييييييييش؟؟ نوره سوت كيه؟؟!!
مريم: اها... ودومها تنازع امي وتنازعني... واقول لامي بنخبر صالح يأدبها...تقول لاتخبريه مانبا نزيد المشاكل بينهم.... واليوم لما رديت من المدرسة حصلت امي تبكي وخبرتني باللي صار وتقول على سبب مايسوى

تحرك صالح عن مريم وهي تتكلم... وراح ركض صوب حجرته والدم يغلي ف راسه... كل اذيه يطلع منك يانوره... أن ماذبحتك... تمدي ايدك على امي!!!!!!!!!!!!!!!!!... وهالسبب كان القشة اللي قصمت ظهر البعير

وفتح الباب بالقوة وكان الشرر يطلع من عيونه... نقزت نوره من شكله...اول مرة تشوف صالح معصب لهالدرجة... وياها ومسكها من شعرها بقوة: قليلة التربية تمدي ايدك على امي؟؟؟؟
نوره حست كانه حد قلع لها شعرها من راسها: اااااااااااااااااييييييييييييييي... فلتني فلتني...صااااااالح
وكفخها على ويهها وهو يشتمها بكل انواع الشتايم... لين مابرد من حرته...وبعدين عقها عالارض... وقال لها بكل ضيق وعصبية واشمئزاز: انتي طالق... طالق.. انتي ماتستاهلي حد يويبك ويحترمك قليلة الادب... اتصلي بهلك خليهم يوك يشلوك...مابا اشوف رقعة ويهك عقب اليوم
وراح عنها... ونوره كانت طايحة عالارض وتبكي وتدعي على صالح وامه واهله...واتصلت بابوها اللي كان ياي جعلان فهذاك الوقت

انتبه صالح لحاله وطلع من دوامة الذكريات....وقال ااااااااه ااااااااااه كرهتيني ف شي اسمه حرمة وزواج.... والحين حمد يايني يقول انت تزوج اسما؟؟! اصلا كيف بسعدها واني مالي بارض!!!

وهنيه دق تلفون صالح.... بومعاذ يتصل بك
صالح بلا نفس: الو
علي: هلا بو محمد
صالح: هلا
علي: هيش فيك؟؟ كنك متضايق؟؟
صالح: هيش اقولك؟
علي باهتمام: قول اللي ف خاطرك... لايكون حمد لما ياك؟
صالح: تقدر تقول كذيه
علي: وراه حمد؟؟ شي فيه؟
صالح متردد يخبر علي ولا لا...مع انه متعود يخبره بكل اسراره...ويشاوره ف اموره: والله مادري؟؟
علي: افا عليك بومحمد... قول.. واذا شي اقدر اساعدك به رقبتي سدادة
صالح: ماتقصر بومعاذ

وخبر علي بالموضوع كله... وأمنه مايذكره قدام حد حتى فاطمه
علي: انزين انت قولي لين متي بتم بلا زواج؟
صالح: ياخي مابا اتزوج... انسدت نفسي عن الزواج... مابا مشاكل وعوار راس
علي: الحين شوف حياتي مع فاطمه... تشوفها مشاكل وعوار راس؟؟... والله متهنيين ومرتاحين... الحريم مب كلهن واحد
صالح: ادري... بس صدج احسني مب متهيأ له الحين
علي: ياصالح... تراك انت اللي تقدر تقنع عمرك وتغير هالفكرة... واذا تشوف بنت عمك ماتنعاب ليش توطيها؟ وبكذيه بتحل المشكلة كلها... لان حمد مستحيل يوافق دامه حاط وحده غيرها ف باله... وحرام تجبروه عليها
صالح: بنت عمي مب عليها قصور... والنعم ف اخلاقها... وصراحة من زمان تعيبني شخصيتها... ودوم اقول لمريم متي بتعقلي مثل اسما... بس مافكرت فيها كزوجة...كنت متوقع حمد بياخذها... ومابيطلع لنا بهالمشكلة
علي: بقولك شي يامحمد
صالح: هيش؟
علي: استخير رب العالمين... وماخاب من استخار
صالح: صدجك والله... لهيش لي بتعب الراس والتفكير؟؟ دام رب العالمين موجود
علي: والنعم بالله.. الحمدلله
صالح: اني بستخير... وعسى خير
علي: أن شاء الله خير... لعاد بوطيك الحين... ونتلاقي باكر
صالح بامتنان لرفيق حياته: ماقصرت بومعاذ
علي: افا عليك... ماسويت شي
صالح: الله يخليك.. تصبح على خير
علي: وانت من اهله مع السلامة
صالح: مع السلامة
وبند علي... صالح حس عمره شبه ارتاح... وقام يتوضي عشان يصلي صلاة الاستخارة... صلي وبعدها رجد


وف الصباح... محمد وعايشه قاعدين يتريقو
عايشه: ظنتي حمد بارحه مابات هنيه
محمد باهتمام: مابات؟؟
عايشه: الفجر مشيت اورقه للصلاة... ومالقيته ف حجرته... وفراشه مرتب
محمد عوره قلبه على ولده... اكيد مارد من اللي صار بارحه... لا اله الا الله... هيش آالمشكلة؟؟... الله يهديك ياحمد.. هيش بنقول لعمك؟؟

وهنيه نزل صالح من الدرج...وهو قايم يحس براحة غريبة وتهميمة بارحة راحت عنه ولا كانه صاير شي... ويا صوب اهله: صبحكم الله بالخير (وقعد عشان يتريق)
محمد: صبحك الله بالنور
عايشه تنادي الخدامة: درمينيا... ييبي زيادة خبز
صالح: مابا شي.... بس كبيلي شاهي
عايشه بحنان: هيش ماتبا شي؟؟ تريق
صالح: مالي نفس
محمد: اخوك ماتعرفه هين بايت؟
صالح: اصريه مب بايت هنيه؟؟
محمد: لا.. ماتعرفه هين بيبات؟
صالح ف خاطره... مسكين حمد.. اكيد متضايق من السالفة... بس هين بيبات؟
صالح يطمن هله: ماقال لي شي... بس اكيد بايت هو وربعه برى
عايشه: اتصل به... تشوفه هينه؟
صالح: يامي حمد مب اول مرة يبات برى البيت... اكيد مع ربعه
محمد وهو قايم: صالح... اذا خلصت اباك.. تعال لي ف المجلس
صالح: أن شاء الله
وبعد ماراح محمد...
عايشه تسال ولدها: هيش فيهم ابوك وحمد؟؟ ابوك من بارحه متهمم ومتضايق.. من عقب ماتكلمو هو وحمد ف المجلس... ويوم نشدته هيش فيك؟ قال: ماشي.. بس الشغل تاعبني... وحمد للحين مارد!!
صالح يكذب ويطمن امه: مب فيهم شي... اكيد ابويه تاعبنه الشغل... وحمد سهران مع ربعه وبات معهم
عايشه قلبها يقول اكيد شي صاير..وتقول لصالح: يمكن

صالح بعد ماشرب الشاهي راح لابوه ف المجلس... ولقاه جالس يتابع الجزيرة
وقعد جنبه: هيش ف خاطرك ابويه؟
محمد قصر على التلفزيون والتفت على ولده: ابا اكلمك عن حمد
صالح بحزن: تراه خبرني بارحه... عقب ماخلص كلامه معك... ياني وخبرني
محمد بتهمم: ابا اعرف هو هيش شايف على بنت عمه؟
صالح: هو مب رافض اسما عشان شايف عليها شي... بس يقول يعتبرها مثل مريم
محمد: اذيه كلام يديد نسمعه منكم يالشباب... كيف يعتبرها مثل اخته وهو مب عايش معها؟؟
صالح: يقول اسما مب عليها قصور... بس قلبه مب هاونها.. يقول يرضيكم اخذها واطلقها؟؟ ولا اتزوج عليها؟
محمد: لا.. مايرضينا... بس اني وعمك متفقين من قبل
صالح: تراه هنيه المشكلة
محمد: انزين هيش رايك انت فيها؟
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

انتظرو احداث الجزء السابع:cool:
مع ارق تحية مني