منتديات جعلان - عرض مشاركة واحدة

 · 10:09 PM

اشد هوه الولد الوحيد في عائله ابو راشد .. وطبعا توه متخرج من الثانويه .. وابوه حب يشتري له سياره .. وراشد معروف من عشاق السرعه ومتهور كثير ..وطبعا راشد كان يسوق سياره البيت .. وكان معروف بسرعته بالحواير والتخميس و التهور ..
راشد : السلام عليكم شخباركم
حسين : هلا رشوود وعليك السلام
راشد : باركولي .. ابوي بيشتري لي سياره جديده
حسين : مبروك رشوود بس ايش نوعها ؟
راشد : بشتري كورفت .. تعرف انا احب سرعه وايد .. وبعد بطلب لها اغراض من امريكا عشان ازيد قوتها
حسين : غير الي عنده فلوس
راشد : بدينا بالحسد ؟
حسين : لا والله الله يعطيك خيرها ويكف عنك شرها .
وفي هذه لحظات ... بالسوق جالسين الشياب .. سلطان و سيف بالسوق يسولفوا
الشايب سلطاان : اوه سياف هيه هيه يرحم زمان اول يوم سوق كان فيه زحمة وكل يشتري من السوق وكنا نشوف الناس ونسلم عليهم .. شوف كيف الحين السوق فاضي ماحد فيه غيرنا انا وياك .. ومن نموت راح يبقى فاضي .
الشايب سيف : فال الله ولافالك .. كيف نموت انا بعدني شباب بس انت الي شيبت .. وانا بتزوج عن قريب
الشايب سلطان : ههههه انت شباب ؟ ومن قال ؟ ماشفت وجهك انت ؟ ما شفت ضروسك ؟ الي طايحات كلهم مابقى فيهم الا ضرس واحد تقول حارس الحصن ..
الشايب سيف )) ويغني الشايب سيف )): هيه هيه نعيب على الناس والعيب فينا تم تك تك تم ... شوف عمرك انته .. الحين بتوصل 70 ومافيك ولاضرس .. على الاقل انا عندي حارس واحد ..
الشايب سلطان : هيه هيه ياخوي الحمدالله على كل شي اهم شي الصحه ياخوي .. يرحم زمان اول كنا ناكل كل شي طازج .. موب الحين نروح حق بابو وكوبل .. نشتري من عندهم ..
الشايب سيف : اهي اهي والله خليتني اصيح وانا اتذكر زمان اول .. يوم كنا شباب وكنا نقطع المسافات برجولنا .. او بالحمير .. موب الحين كل واحد عنده سياره ومايقدر يمشي من بيتهم الى بيت الجيران ...
الشايب سلطان : صح كلامك .. ومن زمان محد كان يموت الا اذا كان مريض او طايح من فوق نخله او رافسنه حمار .
الشايب سيف : والله صح كلامك موب الحين كل يوم نسمع ود فلان مات والسبب حادث .. ولد فلان تعور والسبب حادث.. والي يقهرني ياخوي انه ماحد يتعلم او يتعض من الي يشوفه ..
وفي هذه لحظات يمر عليهم راشد بسيارته الجديده مثل الرصاصه ...
الشايب سلطان : استغفر الله اشهد ان لا اله الا الله وان محمد رسول الله ... سيف وين رحت ؟ وايش الي صار
الشايب سيف : اوه سلطان استغفر وتوب قامت القيامه ... ماسمعت صوت الرعد والارض كيف تهتز والسماء مافيها غيم .. يارب لاتجعلنا من المحشروين واجلعنا من المبعوثين يارب ...
الشايب سلطان : امين يارب ..
وفي هذه لحظات يمر عليهم حسين ولد.. الشايب سلطان ..
حسين : ابوي وعمي ايش فيكم وليش كذا خايفين
الشايب سلطان : قامت القيامه .. سمعنا صوت رعد والارض تهتز وريح ... احمر ..
الشايب سيف : ياولدي استغفر وتوب ..
حسين : يضحك بصوت عالي ... يا ابوي وعمي هذا راشد ولد ابو راشد بسيارته الجديده .. سيارته تسوي هذا الصوت وتهز الارض من قوتها ..
الشايب سيف : لا والله ؟ وهذا الولد مايتوب ومايرحم احد ومايخلي رحمه ربه تنزل .. يعني بالسوق ويسرع ؟
الشايب سلطان : موب منه من من ابوه الي ماعرف يربيه ... بس اخوي سيف اجهز بنروح للبيت وبناخذ سيارتي ونبروح نكلم ابوه .. بنقوله ياولد الحلال الكل يحذر وصاحب الجلاله يحذر وانت تشتري حق ولدك اسرع سيارات ..
الشايب سيف : ياخوي احس مافيني رجول تشلني .. من الخوف انتظرني شوي ..
الشايب سلطان : اوه باابوه اوه بابوه جيب واحد عصير الي يطلعوه بالتلفزيون الشايب سيف مايقدر يسير يمكن يطير بهذا العصير ..
حسين : ههههه عمي سيف تشرب ريد بول ؟
الشايب سيف : اها اشرب درام بول .. وانته تغار ؟
الشايب سلطان : استغفر الله .. ايش هذا الكلام يا اخوي اسمه بريد بول ..
الشايب سيف : لا بريد عمان اوين يبا يكحلها وعماها ..
وفي هذه لحظات الشايب سلطان والشايب سيف رايحين الى بيت الشايب سلطان ..وهم جاين يقطعوا الشارع ...
الشايب سلطان : انتظر ياخوي خلينا نشوف يمين ويسار عن السيارات ..
الشايب سيف : والله صدجك .. حتى بالرسوم نشوفهم يسون كذي .. والشرطه تقول نسوي كذي .. والناس صم عمي بكم مايسمعوا الكلام ابدا ..
وينزل راسه الشايب سلطان في هذه لحظات ويحط راسه على الرصيف ..
الشايب سيف : خير ايش فيك يا اخوي .. راسك يعورك؟
الشايب سلطان : اسكت شوي .. وبعد لحظات .. يلا نقطع الشارع
الشايب سيف : ياخوي لايكون فيك شي اشوفك خليت راسك على الرصيف ..
الشايب سلطان : انا جالس اسمع لسيارت راشد ولد ابو راشد وسيارته.. اسمع صوتها بالقار اذا بتمر علينا او لا ..
الشايب سيف : اها .. قول كذا .. زين زين ياخوي تاخذ حذرك ..
وفي هذه لحظات يوصل الشياب سلطان وسيف الى بيت سلطان ..
الشايب سلطان : هيه هيه هذه السياره الي تعزك .. قديم بريسم ولاجديد صوف
الشايب سيف : والله هذه سياره صح انها قديمه وماتسرع اكثر من 80 بس الحمدالله ماصار لنا فيها حوادث
الشايب سلطان : انتظر بفتح لك الباب ..ويركب الشايب سلطان ويشغل السياره ويفتح الباب حق الشايب سيف
الشايب سيف : اللهم اعوذبك من الخبث والخبائث ..
الشايب سلطان : سود الله وجهك .. ياسويد الوجه ..انت داخل سيارتي ولا داخل الحمام ؟
الشايب سيف :لاتلومني يا اخوي الخوف بعده فيني ..
الشايب سلطان : زين اركب واربط الحزام ..
الشايب سيف : وين الحزام ياخوي ما اشوف غير الحبل الي رابطين فيه البقره امس
الشايب سلطان : وحن ايش نريد ؟ غير حبل يمسكنا اذا سوينا حادث ؟
وفي هذه لحظات يروحوا الشياب الى ابو راشد .. وخبروه عن ولده ورفض كلامهم وقال ان ولده مايسرع وماحد له دخل بولده .. ويطلعو الشياب .. وهم مكسورين الخاطر من ابو راشد ..
وفي هذه لحظات .. يمر راشد على حسين ...
راشد : يلا حسين اركب بنروح نتمشى .. شوي
حسين : انا رايح المسجد الحين .. والمسجد قريب خليني اكسب الاجر ..
راشد : انت تعال انا بوديك .. وبنروح نصلي مع بعض
حسين : بس بشرط ماتسرع ..!! اوكي
راشد : ان شاء الله انت تعال ..
ويركب حسين مع راشد .. ويدخل ابليس ويضحك على راشد ويقوله حسين مايوثق فيك وفي سياقتك ..وانت ماتعرف تسوق زين روح خليه يشووف مهاراتك والصلاه مابطير كلها دقايق وترجعوا ..وبدا يسرع راشد ويغير مساره عن المسجد ..
حسين : راشد خفف السرعه .. وين رايح المسجد رحنا عنه
راشد : اريدك تشوف مهارتي .. بسياقه وعشان تعرف اني اعرف اسوق .. ولاتخاف خليك عادي والمسجد مابيهرب
حسين : استغفر الله .. هدي سرعه ياراشد هدي السرعه ..
وراشد يزيد السرعه وهوه متجاهل كلام حسين .. وفي هذه لحظات تنحرف سياره ويفقد راشد السيطره ..
حسين : راشد راشد انتبه انتبه ..
وبعد عدة ساعات يصحى راشد وهوه بالمستشفى ويشوف ابوه جنبه يبكي .. ويقوله له
ابو راشد : ولدي طمني عنك ايش تحس وكيف صحتك الحين ؟
راشد : يابوي وين انا وين حسين ؟
ابو راشد: انت بالمستشفى .. وحسين ... حسين ... عطاك عمره ..
راشد : ويصرخ لا لا انا السبب انا السبب .. بتهوري فقدت صديقي .. بجنوني فقدته ..
ويدخل الشايب سلطان والشايب سيف ..
الشايب سلطان: ايش سويت بولدي ؟ ليش قتلته ... ايش راح تستفيد الحين ؟؟ فلوس ابوك ماراح ترجع لي ولدي ..
ولدي الي ضيعت مستقبله .. وانهيت حياته .. ولدي الي يصلي ويصوم .. والي باقي له شهر ويتخرج ويطلع مهندس ..
ايش الي استفدت منه الحين قولي ..انهيت حياة ولدي .. بتهورك ..ايش ايش ايش الي سوويته (( وينهار الشايب سلطان في البكاء ..)
الشايب سيف : يا اخوي استغفر ربك .. وربك اخذه .. وان شاء الله مثواه الجنه .. لاتبكي ترا البكى يعذب الميت .. وانت ياراشد .. يعجبك الي صار الحين .. توفى حسين والسبب تهورك .. والناس كلها تحذر والشرطه تحذر وصاحب الجلاله يحذر .. وانت ماتسمع الكلام ..كل يوم نسمع عن الوفيات .. وبدل مانخفف نزيدها كل يوم ..صح كلامك يامولاي يوم تقول ان الناس تفكر ان سياره بساط الريح راح تاخذهم الى أي مكان بسرعة الصوت .. الحين راح حسين .. راح
بس العيب والخطا موب منك .. من ابوك الي ناصحناه .. وقال مالكم دخل في ولدي ... شفت أي عمل ولدك الحين ؟
تخيل ان ولدك مكان حسين .. تخيل لو دقيقه بس ..

وفي هذه لحظات يبكي ابو راشد ويقول انا السبب .. انا السبب دلعت ولدي .. وراح ضحية هذا الدلع حسين ..
وبعد مرور 4 ساعات .. الناس كلها تتجمع لاخذ جثمان حسين الى المقبره والناس كلها تبكي ... وراشد هرب من المستشفى عشان .. يودع صديقه الي قتله ..وهوه يبكي ... وعند وصوله الى المقبره .. يشوف ان كل الناس تشووف عليه وهيه حاقده عليه .. وعلى تصرفه .. وان جميع الناس بدات تكرهه .. وراح راشد الي بيتهم وهوه يبكي .. على الي صار وهوه ندمان ...وانهدم مستقبله لان الناس بدات تكرهه .. ولانه قتل صديقه بتهوره ... ولكن
نعم ولكن .... كان هذا مجرد حلم .. كان يحلم فيه راشد وهوه نائم .. كان كابوس مؤلم .. ولكن الله ستر وكان هذا مجرد حلم ..وماحد يعرف المره الثانيه .. اذا راح يكون حلم او لا ... ليش نحن ما ننتبه ... كم شخص عزيز فقدناه .. بسبب هذه الحودث .. ليش مانتهم بانفسنا واروحنا الي هيه امانه عندنا ... ليش ليش ... الله يحفظ الجميع ويسلم الجميع من مخاطر الطريق ... وان شاء الله تكون هذه عبره للجميع

مسرحية تم تمثيلها وعرضها بيوم الشرطة .

جميع ماكتب بقلمي : سلطانـ...