؛؛
؛؛
حتى وأنا من طعنة الغدر مقتول
لازلت آصافح كفّه اللي غدرني
أنزف واضمّد ( جرحي الصعب) وآقول :
الله يسامح طيبي اللي غمرني
ياقلب صار الطيب ماهو بمقبول
حتى ولوّ إنّه آسرك و أسرني
ياقلب أنا في خاطري ، علمٍ يجول
لابد آقوله لو بياضك خسرني
ابا أعتبرك إنسان واعي ومسئول
وأنت إعتبرني مثل ما تعتبرني
بيض النوايا مالها أي مدلول
الاّ أنّها على الندم تختبرني
تعبت أجي مذهول ، وآروح مذهول
من وقتي اللي كل ما أجبر كسرني
وأصحابي اللي فالرخاء قولهم قول
وقت القسا مامنهم اللي نصرني
وحيد لو حولي من المجتمع ضول
والضحك ، حتى الضحك غاب وهجرني
أصبحت مع نفسي عن الناس معزول
ولا أحدٍ تركني في خلاي و عذرني
كلٍ يلحقني من القول منقول
وأنا لي الله غفلتي تحتكرني
أقدر آجاريهم ، وأجي قلب معلول !
لكن بياضك كل ما أنوي زجرني
ياقلب لو ، يطول ويطول ويطول
وقتي أنا تحت أمرك اللي أمرني
بأبقى معك وألبس بياضك على طول
وآشكر جنابك لو جنابك نهرني
يعني وأنا من طعنة الغدر مقتول :
الله يسامح كل كفٍ غدرني