ياليت الزمن يرجع ورا ولا الليالي تدور
ويرجع وقتنا الاول وننعم في بساطتنا
زمان اول احسه فيه صدق شعور
نحب ونخلص النيه وتجمعنا محبتنا
زمن مافيه لاغيبه ولاحتى نفاق وزور
ياليته بس لو يرجع ونسترجع طفولتنا
صغار قلوبنا بيضا نعيش بعالم محصور
ولا نعرف ابد اغراب مغير عيال حارتنا
صحيح صغار في التفكير ولكن ماعلينا قصور
نخطط نكسر اللعبه وتسعدنا شقاوتنا
نروح المدرسه بدري ونضحك داخل الطابور
نحاول نزعج العالم في روحتنا وجيتنا
وعشان نأخر الحصه نخبي علبه الطبشور
نشاغب بس في الاخر تميزنا برائتنا
نحب الضحك والهيصه نحب ننط فوق السور
نفرفش ليه مانفرفش ما دام الضحك عادتنا
ولكن دارت الايام وبان الخافي المستور
وصار الهم متعلي على قمه سعادتنا
كبرنا وصارت الدنيا تصف احزاننا بالدور
وتهدينا الالم والهم غصب عن عيني رغبتنا
تعبنا من بلاوينا احد غارق واحد مقهور
وكلن غارق بهمه وفي الاخر تشتتنا
وانا ما اقول غير الا ياليت ان الزمان يدور
ونرجع للورا فتره نعدل وضع عيشتنا