منتديات جعلان - تقـدم الدنيـا لنـا درس ٍجديـد بكـل يـوم

تقـدم الدنيـا لنـا درس ٍجديـد بكـل يـوم
والناس تسلم من غثا الدنيا بحفـظ دروسهـا

وعلى حسب حفـظ المواجيـب وتعاليـم السلـوم
نعـرف مقاسـات البشـر بالمرجلـه و نقوسـهـا

صيت الرجال الوافيّـه بأفعالهـا .. و الا ّ الرخـوم
ينبيـك عنهـا : قـل نفعتهـا و شيـن نفوسـهـا

تطرد ورى الدنيا و تكشـخ بالمواتـر و الهـدوم
مثل ( الحريم ) أغلب دراهمهـا علـى ملبوسهـا

و الإمعه و الشايـب الكـذّاب و ضعيـف العـزوم
ناس ٍ مع العالـم بـلا هيبـه تدربـي روسهـا !!

و البخـل : خلاّنـه بهايـم !! لا تسـام و لا تـسـوم
لا شفتها ترفـع يـدك حمـد و شكـر و تبوسهـا

على الصحن هم أول الجـلاّس و آخـر مـن يقـوم
يعيّفـك حلـو الأكـل و الشـرب طـول جلوسهـا

ما هيـب للـلازم سنـد و لا ذخـر عنـد اللـزوم
تمـوت ماسـرّك مهايطهـا و كـثـر فلوسـهـا

و سوالف الخبلان .. رفعة ضغط و صـداع و همـوم
فـلاوة ٍ تخطّـف عـلـوم الـعـرب و تحوسـهـا

واجب عليك إليا حكت عن جملة حكاهـا تشـوم
الهند مـا يـرأس حكومتهـا سـوى هندوسهـا

و ربـع المصالـح و المجامـل خـوة ٍ ما هيـب دوم
أقولهـا و التجربـه قـطـع وريــدي موسـهـا

وقت الرخا .. مثل الصقور اللي على المرقب تحوم
فيّ ٍ يـذّري ساقـك الرمضـا و حـر ّ شموسهـا

و إليا احتمت صكّات بقعا و أمست علومك علـوم
تلـوّي خششهـا و تجحـد خـوّتـك و تدوسـهـا

من عقب ما أنت الطيّب و قدرك معزّز و محشـوم
تصيـر أردى مـا خلـق ربـي و دم ضروسـهـا

أبعد عن الأشكال ذي .. بعد الثرى عن النجـوم
وش حاجتك في قرب رديان العـرب و نجوسهـا

ما هوب عيب إليا عزموك تقول يا الربع .. معزوم
العيـب : لارحـت لعزايمهـا و جيـت عروسهـا

و خلّك فطين تعلّمـك دنيـاك درسٍ بكـل يـوم
و الرجل يسلم من غثا الدنيـا بحفـظ دروسهـا

* للشاعر/ محمد جار الله السهلي *

م/ن