|
ألا يآدنيآ آلآ ليت آلزمان يرجع ونرجع وقتنا الاول
يبتلكم قصة جديدة قصيرة لين نتصافى انا وراشد واحلام biggrin
اتمنى تعجبكم ألا يآدنيآ آلآ ليت آلزمان يدور ويرجع وقتنا الاول وننعم في بساطتنا" للكاتبه همسات الحنين ثرت الصبح من الغبشه..عشان الليم بتي مزنه..يالله صارلي سنتين م شفتها.. من انتقلوا السعودية م يو عمان ابدا .. والليم بعد سنتين من الغيبه رجعوا خلاص..لأن ابوها بطل الشغل هناك بسبب تقدمه فالعمر.. المهم..تسبحت ولبست احلى ثيابي ..رفعت شعري بكماشه لفوق ورغم كيه مازال يوصل لنص ظهري.. افكر اقصه عصر بعد متروح مزنه.. ألحين أهم شي اخلي عمري احلى منها..اذكر زمان كنا نتنافس الي بيكون شكلها احلى..خصوصا فالعيد.. وعاد اني انتفخ لما خوتي يقولوا اني احلى عنها..."يالله اشكثر اشتقت لأيام زمان؟!" انزين !! خلونا فالحاضر ألحين..حطيت ميك اب خفيف ..وحطيت شيله فيها زركشه بلون ثوبي فوق الكماشه وخليت بكلتي نازله ع جانب اليسار من ويهي.. فتحت الباب شوي شوي..وطلعت وسكرته ورايه.. دخلت المطبخ..وخذيتلي لفه محترمه فيه..سويت شاهي ، كيكه ، باسكوت... واني جالسه اقطع الكيكه : هيش تسوي؟؟ امل: بسم الله الرحمن الرحيم..روعتني.. مازن: ههههه ..تستاهلي الحرامية كملت الي كنت اسويه: م سرقت شي عنك..جالسه اسوي شيئا اضيفبه ربيعتي مازن: من مزنوه؟ امل: عيب عليك..البنيه صارت حرمه ألحين..اياني واياك تنبزلها منيه مناك..ترا اعرفها حركات !! ترا والله اخبر عليك امي مازن يأخذ قطعه: خبري..الوشايه دفيته: خوز عني! مالت (واني طالعه فالصاله) مزنه: السلام عليكم.. من فرحتي بدت دموع تصب صبيب: ياهلا بالزين كله.. مزنه: هلا فيج! واحضان وبوس وبكي ساعه م تفالتنا.. مزنه: يله عاد..يعني تبي تفهميني انج صرتي رقيقه؟؟ ههههه امل: جربي .. جلسنا ف طرف الصاله وسوالف م سكتنا ..مع أنا م انقطعنا عن بعض ..دائما رسايل ليل ونهار.. مرن علينا ساعتين مندون م نحس بهن..وين خواتي وامي وسلمن عليها ..بعدين روحن بيتهم عشان يسلم علي خالتي ام مزنه وعيالها..واني وهي مستمرين فالسوالف.. مزنه تضربني علي فخذي: تعالي قلتيلي بقولج عن السالفه يوم بتي..وهاه اني يت يله احكيلي..متحمسه حدي.. امل: ااااي يادبه.. مب ألحين بعدين اقولج! مزنه: والله تقولي ألحين..كان أني صارلي 8 شهور احسب متى بشوفج..ف الاخير تقولي بعدين يله يله ألحين بتقولي.. امل: امري لله.. بس أول بنروح الميلس.. مزنه: يله بسرعه بسرعه.. روحنا الميلس.. أول م دخلنا كانت ريحة عطورات رجالية فايحه فيه.. مزنه: املوه..ليكون حد من خوتج منخمد هنيه؟! امل: هههههه لا..لا ترتاعي.. مزنه: مب داخله عندج.. انتي تروحي العطر ولأ لا.. انزين كملت دخلت قبلها ورفعت الدشداشه المعقوقه فوق الكنبه.. وجربتها من خشمي وشميتها بعمق وأني عاطتنها ظهري "اااااه فديت هالريحه وراعيها" مزنه: امول..حد هناك؟! تملكتني العبره وأني ارد عليها : ياليت مزنه: هاه؟؟! مسحت دمعتي وبتسمت بالغصب: لا دخلي ياالخوافه..(دخلت) اذيه سعيد وربعه كانوا سهرانين بالرحه هنيه مزنه ببتسامه حلوه: هاه؟ امل: ايوووه..ضحكت.. عشان سعيدان هاه؟؟ ههههههه والله انج هبله.. عقت عمرها علي الكنبه: ليش ان شاء الله؟ امل: عيل حد يحب سعيد خويه مزنه: مالت عليج... لا تغيري الموضوع وحكيلي السالفه الي خلتج تمرضي اسبوع كامل وم تكلمي مخلوق.. يا الدبا ..حتى أني م رديتي علي رسايلي انسدحت سيارهي وتنهدت من الخاطر : ااااااه.. مزنه: م جدر اني هههه السالفه فيها تنهيد؟! قولي قولي يله امل: ان شاء الله..بس لا تقاطعيني لين اقول خلصت اوكي؟ مزنه: اوكيه .. امل: اذيه الله يسلمج..قبل يوم من سفركم.. |
فتحت النت ودخلت منتدى كنت احط فيه خواطر ..هرابيتي الي اهربتها دوم عليج ههه
انزين..اذيه المره فتحت قسم المدونات وسويتلي مدونه بعنوان "ألا يآدنيآ آلآ ليت آلزمان يدور ويرجع وقتنا الاول وننعم في بساطتنا" وجلست اعبر فيها عن كل الهم الي فيه بسبة اننا بنفترق.. كتبت عن طفولتنا رباع .. عن مشاغبتنا .. عن اليوم الي قرر ابوج ينقلكم عنده!! المهم... اليوم الي بعده ..بعد ماروحتو.. لما فتحت المنتدى ودخلت اسمي لجيت رسالتين خاصه "وحده من (بنت عمان) تتمدح ف الخواطر الي كتبتهن" "والثانيه من (المهاجر) كاتبلي أني مستاهل الي يصيرلي وانه هو بعد تغرب عن هله وربعه عشان يدرس ف أمريكا وانه هو من عمان و حاس فيني ومن هالقبيل" وأني حسيت أني محتاجه افضفض لحد .. خصوصا انه خواتي متزوجات وساكنات بعيد ومعندي غير الاه المهابيل ..فكتبت له رد .. مزنه: هيش كتبتي.. امل: مذكر بضبط..بس كان كلام عادي.. ظلينا علي الخاص فوق شهرين وزايد..يحكيلي عن جامعته وعن الاجواء هناك ..وأني اخبره عن الي يصير عندي ف المدرسه..وبما أني كنت ثالث ثنوي..كانت دخلاتي تقل يوم بعد يوم.. خصوصا ايام الاختبارات..كنت اكرها حيل..لأني م الجى فرصه ادخل..هو دايما كان يقولي ركزي ف دراستج ولأ دخلي ألا من تخلصي كل الي عليج.. بس كنت اتضايق لما م دخل .. واتضايق اكثر إذا دخلت وم حصلته موجود.. انزين.. تميت كيه شهرين بعدين تطورت علاقتنا للمسن.. صرت ساعه ادرس وساعه اراسله من الفون.. تصوري .. كان هو احرص علي دراستي مني.. كله ينصحني بالمراجعه والتحضير الدائم وووو.....والنجاح ونجحت نجحت بس عشان خاطره... (خذت نفس واني اتذكر فرحت لما قلت له أني نجحت وقبلوني بالتخصص الي احبه) كانت ايام حلوه يامزنه..كنت احس بمشاعر واحاسيس غريبه ف اذيج الايام... م انقطع عني ولأ يوم .. ومرت سنه علي علاقتنا.. صرت اعرفه واعرف شخصيته واعرف هيش يحب وهيش يكره..اعرف جدوله اليومي..اعرف هيش لابس بارحه وهيش بيلبس اليوم..اعرف اهله وشخصياتهم..صرت احس أني ساكنه عندهم واعرف تحركاتهم.. واحس انه هو ساكن عندنا ويعرف كل تحركاتنا... (((((((بأختصار صار جزء مهم من حياتي..))))))) بتصدقيني إذا قلت لج أني دخلت الكلية وطلعت مندون م اكون اي صداقه؟؟؟! م كونت أي صداقه.. لا م حتاجها دام جاسم عندي.. مزنه: اسمه جاسم؟؟ هزيت راسي بنعم وكملت: وحبيته...اها حبيته.. وأني اعرف أنه اذيه الحب غلط..بس قلبي اختار اذيه الشي.. ف واحد من الايام رسلي "روح الأمل.." "لبيه" "حلقت الكشه" "هههه كشه؟؟ انت م قلت م تحب شعرك لما يكون طولنا" "اها" "عيل اي كشه تتكلم عنها" "لحيتي هههه" ورسلي صورته.. مزنه بشهقه: هااااا امل: ارتجفت من داخل من صميم قلبي...مب خوف!! لا بس حب له!! مزنه: ياعيني.. امل: مزنه.. بعد الصوره تأكدت أني احبه صدق..ألا اموت فيه.. مزنه أنتي م تعرفي هيش يستوويلي يوم يغيب عني بيوم..اين.. استخف..م جدر اتحكم ف اعصابي.. مزنه: يا قلبي..وهو هيش شعوره ناحيتج؟؟ امل: هو م كان يعترف بمشاعره اتجاهي..عشان م اعصب ويخسرني..م كان يعرف أني انتظر كلمه بس منه!! وبدت دموعي تسيل..وصار صوتي مبحوح وأني اكمل الها القصه..: ومرو سنتين..وولأ واحد فينا اعترف بمشاعره..مع انا كنا نحس ببعض ونعرف انه كل واحد شال ف قلب احاسيس م يجدر يشلها اليبل!! ويا ذاك اليوم..قبل 8 شهور كنت جالسه فحجرتي اراجع.. دخلت عليه أمي ببتسامه شاقه الحلج: مبروووك امل بستغراب: علي هيش؟ أمي: عمج حمد..ربيع ابوج ..تذكريه؟؟! امل بخوف: اها ..وراه؟ أمي: خطبج من ابوج لولده! امل بصدمه: هيــــــش؟ قولوله مب موافقه أمي بعصبيه: عن الدلع..الريال ربيع ابوج من زمان..وواقف عنده ف زين والشين.. اصلا ابوج عطي الريال كلمه وخلص الموضوع.. امل تعق عمرها ع الكرفايه ودموعها ع خدها: تراه من بيعرس أني ولأ انتو؟؟ أني مب موافقه..ارجوج أماه لا تغصبوني علي شي م اباه أمي تمسح علي شعره: ابوج حدد الليم يوم الملكه..والخميس اليايه العرس..وصدقيني يابنتي مب لاجيه حد يعرف مصلحتج مثل ابوج!! عقيت ثقلي ع الكرفايه وبكيت من قلبي ... ف ذاك اليوم اعتزلت الأكل وصرت اشوف مسجات جاسم بس م رد عليه..م عرف هيش اقول له.. الكل كان يظن اني مخيله عشان كيه محد جرب صوب حجرتي .. ويا الملاك.. طق طق طق مازن: امل..امول.. امل بضيق خانق: هيش تبا؟؟ مازن: لا تنهري.. ابويه يقولج زهبى الشيخ يبا يسمع موافقتج وهنيه صرت انوح بصوت مسموع..الكل يسمعه...حاولوا يكسروا الباب عليه..بس طمنتهم أني بكون أحسن بعد دقايق.. م كنت ابا حد يعرف عن حالتي.. دخلت اتسبح..ولبست ثوب اسود يعكس حالة العزا الي اني فيها .. لفيت الشيله ع رأسي ووقفت...وقفت جدام الباب اشاور عمري "اخبره؟ لا.. هيش بستفيد؟ ع الأقل يعرف..يعرف أني خلاص صرت مرتبطه" واخيرا قررت روحت سيده وفتحت الاب بسرعه بسرعه..ولجيت اون لاين فديته..فديته انصدم..الله لا يخليني يوم اني يبت له الوجع.. |
" وينج؟" " أني انزف لموتي" "سلامتج..ليش؟ شي صاير عندكم؟" "جاسم" "عيونه" " انته انسان رائع.. بس" "بس هيش؟" " بس القدر كاتب انه اليوم يكون اخر يوم اكلمك فيه" "م فهمت.. امل..أني ضايقتج بشي؟" " بالعكس..كل لحظه معك كانت من احلى لحظات حياتي" " ؟؟ أني مب فاهم شي من الموضوع" " جاسم.. اليوم ملكتي" "هــــــاه؟؟؟" " بس أني..." "خلاص ابويه حكم.." "امل أني..." "ارجوك..لا تزيد آلامي" (وسويتلهBlock ) (نزلت دموعي) اقسملج بالله يامزنه..أني ما عشت ف حياتي وجع قد اوجاعي ف ذاك الأسبوع... تنومت ف المستشفى ... ونقص وزني وسمرت بشرتي.. والكل ينصحني ع اساس اني عروس وورايه عرس.. بس ..لا حياه بجسمي تناجيهم.. كنت جسم بلا روح.. وذبلـــت مثل الورده.. بدايتها جمال ومفتحه.. ومن نقطفها من بيئتها الي باعثه فيها الروح.. تذبل ف هذيج الايام عرفت معنى الحب..عرفت معنى الالم... كنت كله افكر فيه.. هيش شعوره ألحين؟ يحس بالي أني حاسه فيه..؟؟ولأ كنت بحياته بنت شات ومضت....؟ وبيوم الخميس لبست فستاني..ولأ قولي كفني..وجهزوني للحفله وأني معهم ومب معهم.. وانزفيت للكوشه وكل حد عينه علي البنت الميته الي اسمها عروس.. وكلن يبارك وأني مب موجوده.. ..: مبروك امول.. يقولولج الريال يهبل ...: والله؟ ياحظج يا امول.. عاد لاتنسينا ضبطيلنا واحد من خوته..ترانا بنات خالتج.. ..: امل..املوه ...: شكلهي سرحت ف المعرس ..: الله يهنيها.. تشوفي تشوفي..شكلهم بيدخلوه ...: هاتي غشوه لأمول.. ودخل المعرس ومعه خوتي وخوته.. وخذوا لفه بالنص وأني فكري بعيد وعيني بالأرض.. م حسيت ألا وبشخص يجلس سياري.. رفعت نظري وتشوفته.. كان صدج وسيم .. بس اشوفه م يسوى ظفر جاسم.. نزلت عيني عنه..وجربوا خوتي عشان يباركولي.. م كنت اسمع شي ابد لين سمعت صوت غريب يقولي: مبرووك روح الأمل هــــــوود ..يااهـــل البيت..هــــــود مزنه: يا الله ... قطعوا علينا مسحت دموعي: بشوف من؟ مزنه: بيي معج.. ..: السلام عليكم امل: وعليكم السلام ..: امل الله لا يهينك هاتيلي ثوبي ف الميلس..بدلت بارحه ونسيته هناك..والمصر بتلجيه فوق تلفزون.. امل: ان شاء الله مشيت بسرعه ويبت ثيابه..وهو خذهم وطلع مزنه بستغراب: من اذيه؟؟ امل: اذيه (((جــــــاســــــم))) مزنه: لا لا لا ..كيف؟ ومتى؟ امل والعبره خانقتنها: مزنه..جاسم طلع اخو ريلي.. لما خذتني مزنه بحضنها..حسيت اني كنت كاتم آلم شديد بصدري وألحين طلع.. من بد كل الناس..طلع ريلي اخوه.. طول هذيج الفتره حاولت اكتم حبه اخلاصا لأخوه..بس محاولاتي كلها فشلت.. وظليت طول عمري اردد "ألا يآدنيآ آلآ ليت آلزمان يدور ويرجع وقتنا الاول وننعم في بساطتنا" واذيه نهاية قصتي.. |
يــــــــــوووه ياهمساااات قصه بالحيـــــــــل حزينه
تسلمين يالغلا ،،،جدا روعه ومسليه اتريا كل يديد من صوبج |
لحظه لحظه
شي تكمله ولا لا ترا اندمجت اهم شي يكون شي تكمله عجبني جااااسم واموله ههههه غير اللي يحب غير هههه وطلع اخووو المعرس قصه حلللللوه واااايد واعيبتني بس ملااااحظه شو الليم هههه قولي اليوم مب الليم ههههه الله يوفقج |
هههههه
قصة واايد حلوه ..حتى اني عجبتني .. وامير لازم يعلق ع البنيه ..هههههههه |
اقتباس:
اخجلتي تواضعي ..tongue.tongue. ف القريب العاجل بنزل قصة يديدهwink.wink. |
اقتباس:
|
اقتباس:
خليه ع راحته ...القصة تحلى بتعليقاتكم |
معلووومه جميله
بمسكها الليم |
| الساعة الآن 05:45 PM |
Powered by vBulletin® Copyright ©2000 - 2024, Jelsoft Enterprises Ltd. TranZ By
Almuhajir
][ ملاحظة: جميع المشاركات تعبر عن رأي الكاتب فقط ولا تمثل راي ادارة المنتدى بالضرورة، نأمل من الجميع الالتزام بقوانين الحوار المحترم ][