|
لـمــــــــــــــــــاذا!!!!!!
عندي سؤال يطرق على بوابة فكري بين الحين والآخر..... لماذا لا تنجلي سحابه الجهل عن مجتمعنا في حين ان الكثير من المجتمعات تعيش تحت ظل الشمس المشرقه مع الحفاظ ع الهويه؟؟!! اقصد ليش مجتمعنا الجعلاني لازال متمسك بعادات وأفكار جاهليه؟؟؟ الكثير من الناس لاحظوا ان جعلان لازالت متمسكه بهذه العادات مثل حكرت البنات وصياعة الشباب ورفضهم لأشياء باتت ضروريه في حياتنا.. بس والحمدلله اصبحت هذه الفئه قليله في المجتمع،،وإنجلت تلك السحابة السوداء وتفتحت عقول الاشخاص.... فهل انت متمسك بعادات قد يسميك ع أثرها الناس بالمعقد ام أنت شخص متفتح مقبل ع الحياة والتطور بكل قناعة مع ضروره التمسك بالأساسيات وهي العادات والتقاليد التي تعطيك هويتك الأصليه؟!!! اتمنى من الجميع المناقشه على ان تكون مناقشه هادفه..... |
طرح جميل ينتظر المشاركه ...
|
شكراً على موضوعك اختي ......ماعتقد البنات عندنا اصلن ف جعلان يزدادن زايد الزود ..... بعدين كيف تريدي يتفتحوا الاهل على ويش بالضبط ..... يكفي وجود بعض الناس انهم امورفين لبناتهم ويضحوا علشانهن ويسويوا المستحيل علشان باتهم يطلعن احسن بات ومايغرن من زميلاتهن ويفرولهن احسن الجامعات الخاصه في السلطنه يجدروا ولا مايجدروا اخر شي ويش النتيجه رجعت البنت البيت ماشي معدل طول الفتره اللي يصرف عليه ابوها تعطي مصروفها لصاحبها ...... ولا فوج هذا الشي يمكن ترجع البيت حامل بولد شوارع .... ويش هذا التفتح اللي تجصديه اختي ....... زين وحن على هذا الحال بعدنا انحس انا بخير .... وبعدين حن ما عايشن ف فرنسا ولا لندن علشان البنت اتاخذ حريتها ف الطلعه والرده ... يكفيكم من اللي تسمعوه يصير ف المدارس والكليات والجامعات ... ادعن ربي يستر علينا وعليكن احسن ....
وصياعة الاولد ؟؟؟ ليش اتريدوا اتصيروا مثلهم .... لكان سجون النساء اشويه عندنا خافه خلوها على حالها .... لانه حن عندنا البنات عاشن وتعودن على عادات اهلهن والحمدلله مما فيها شي ساترات اهلهن وبيوتهن وماجابن مشاكل كثر المشاكل اللي يجبنهن البنات لأهلهن الحين ... وجالن كله بسبت الحكره .... بس لما جلسوك ف البيت ما اعتقد يوعوك ولا جصروا فيك ... فايليت ننظر للجوانب السلبيه اكثر من الايجابيه .... واللي يريدوا يجولوه الناس عنا حن اهل جعلان يجولوه ماعلينا من الناس ... علينا من مجتمعنا الداخلي وتربية عيالنا وخوتنا وخواتنا بالصوره الصحيحه ... اتمنى اني اظهرت وجهة نظري بالطريقة المطلوبه ..... وشاكر لك اختي على هذا الطرح الجميل ... واني برايي الاخير البنت تحت ظلة اهلها احسن لها ولا اطيح تحت ظل الشباب الفاسدين اللي ماعندهم شغل غير انهم يركضوا وراء بنات الخلج ويذلوهن ...(( من دور عزاً غير عزه يجيه ابليس ويذله )) |
تسلمين أختي على طرح الموضوع بس أنا رأيي من رأي وليف الروح ومعه بكل كلمة جالها!!
تقبلي مروري |
أولا أخوي سواح مشكور ع الهمسات الطيبه... ثانيا يا وليف الروح يا أخوي كلامك ورأيك ع عيني ورأسي.. بـــــــــــــــــــــس... لو ترجع وتقرى الموضوع مره ثانيه بتحصل أن أنا مقصدت العادات الواجبه والمفروضه والطبيعيه أنا قصدت أن في ناس معقدين ويحكروا ع بناتهم واااااايد وتظهر أذي الحكره في تصرفات البنات لما تسمح لهن الفرصه بالخروج من المنزل سوى للدراسه أو السوق أو حفلات إلى آخره.....فتتفاجأ من تصرف أذي البنت اللي تربت في بيت الكل يشهد بأنه بيت متربي ع أساسيات معينه وأخلاق فاضله و....... إني بصراحه أشوف بنات وايد صايعات فلما أسال عن الأسباب أول سوال بسأله هو كيف الأهل وبيتهم صدجني الضغط يولد الإنفجار.. اللي بغيت أوصله في النهاية أن أعطوا بناتكم الحريه بس بحدود وأخلع عنك مسأله التحقيق وين كنتي؟؟وهيش سويتي؟؟..ألخ لما تحس البنت أن في ثقه بتتعامل ع أنها هاذي الثقه مسوؤليه وتبا تكون قد هاذي المسوؤليه فراح تتلاشئ أي شي ممكن يزعزع أذي الثقه..... هذا رأيي وبكل منطقيه...وفي النهايه مقدر أعممه ع الكل تبقى هناك ظروف وحالات خاصه...ألخ تطلب إجراءات ثانيه.... وتأكدوا حن ننقاش عشان نوجد الحل اللي يجعلنا نعتلي القمم نحن أبناء جـــــــــعلان الغــــــــاليه.... |
ويش رايك اختي بعد مانسأل ابداً عنها .... ليش هيه فوضه تطلع وتروح اي مكان على كيفها .....
اختي حن محاسبين عند رب العالمين .... يصير ف البنت وهيه طالعه اي شي لاقدر الله يجيني اتصال وين بنتك ...... ويش اجول لهم مرغوده ومعرفها وين رايحه .... اسف اختي كلام ماف المنطق ...... بلعكس البنت اذا حصلت حد مهتم فيها اكثر بتخاف على نفسها وايد ..... ياما بنات محكورات واهلهن ضاغطين عليهن بس بعدهن ضلن مثل ماهنه ..... |
وليف الروح صلي ع النبي وبعدين....... أنت ليش تعكس الكلام وتفهم بطريقتك؟!!!!!!!!!!!!!!!! انا مقلت لا تسأل عنها كأن محد فرد موجود معكم،،أنا قلت خفف عليها يعني بالعقل هي أكيد بتستأذن مراح تطلع وتدخل ع كيفها هيش أذي المنطق اللي تتكلم فيه!!!!! أول تمعن في الكلام فكر وبعدين رد ولما ترد رد بهداوه وشوي شوي في النهايه أذي نقاش ونقاش هادف بعد..... فلا حرج عندما نقول أن مجموعه من أهل جعلان تفكيرهم محدود لأنهم متمسكيين برأيهم حتى لو كان هذا الرأي لا يستند ع أي أساس من الصحه وبمجرد التفكير في أنك تحاول تغير هذا الرأي في شي من الصعوبه.... هو صح الأهالي مسؤوليين بس في النهايه كل واحد وطريقته في التربيه...فيمكن أنت أذي طريقتك في التربيه...يمكن... مع إحترامي الشديد لك طبعا........... |
اقتباس:
اختي اني طبيعتي هادي جداً بس انتي هذا الكلام اللي اتجوليه اني بحاول افهمه بس مجتمعنا مراح يحاول يتفهمه ابداً .... لانه انسير على خط واحد عاداتنا وتقاليدنا .... واسف اختي اذا كانت مداخلتي شويه قويه ... |
مشكوور وليف الروح ومشاركتك اللي نوعا ما قويه أسعدتني وتأكد مثل مقلتلك نحن نتناقش ولا تقول المجتمع مراح يتفهم حن جيل يايين نصحح أذي الأفكار وتأكد مشي شي يظل ع حاله....... وتسلم ع المداخلاااات...... |
كثر الدق يفلت اللحم... بمعنى اصح... اغلب البنات الضايعات بنات الشرقيه ... اغلب مب كلهن ::: ماعمم... بس بصراحه هذا اللي نشوفه ف الجامعه... عباااااااااايا ضيجه حيل وهناك عبااااااااااايا راس فضفاضه يدخل فيها خمس حريم ... والشعر طالع برع وحركات مالها داعي عند الشباب وريحة العطر والبخوووور ينشم من بعيد...والله حرام... صرنا اذا نقول نحن بنات من الشرقيه يتجنبنا البنات ع بالهن من البنات الصايعات ...بس اغلب البنات مب كلهن والسموووووووووووحه ع الكلام بسص والله هذا الي نشوفه...
وانا والحمدالله اهلي من النوع المنفتح المتطور بس طبعا محافظين ع العادات والتقاليد المجتمع اللي عايشين فيه... |
| الساعة الآن 12:05 AM |
Powered by vBulletin® Copyright ©2000 - 2025, Jelsoft Enterprises Ltd. TranZ By
Almuhajir
][ ملاحظة: جميع المشاركات تعبر عن رأي الكاتب فقط ولا تمثل راي ادارة المنتدى بالضرورة، نأمل من الجميع الالتزام بقوانين الحوار المحترم ][