منتديات جعلان - لحـــــــــــــــــظة نـــــــــــــــــــــدم

......لحظـة نـــــــــدم......

كتبت الشعر مو لجلك ولكن فاض بي بركان
واما انتي فلا تسوي قصيدة في نظر عيني

حلفتي لي تصونيني اذا صار الزمن خوان
وأول ما عثر حظي على دربك خذلتيني

كسر رمح الزمن صدري وجيتك اشتكي حيران
نزعتي الرمح من صدري وفي ظهري طعنتيني

خسارة كيف حبيتك؟؟! نعم والله انا ندمان
غبي ادري نعم ادري ما دام انك سكنتيني

ثلاث سنين من عمري انا في لعبتك غرقان
أشيل الشوك من دربك وجرحي كان يدميني

وكنت ابكي اذا تبكي واكون لبسمتك فرحان
وكنت اقرب من رموشك لعينك يوم تبغيني

عرفتك للاسف صحرا وحولتك الى بستان
وشلتيني غصن أخضر وفي صخرك زرعتيني

حفرتك داخلي ضني تصوني عشرتي أزمان
وكنت احفر قبر موتي على ساحل شراييني

على كف الشقا نامت جروحي والألم سهران
يحطمني يبعثرني وفي صحراك يرميني

ولكن عزتي تفرض أكون بدنيتي"سلطان"
وان ظنك أجي اركع لرجلك ما عرفتيني

أنا ما عادتي أشحت من أمثالك رضى وأحسان
أموت بعزتي ارحم ولا ذلك يغطيني

وما دام الوفاء عندك يدور له على عنوان
بدور لي على قلب يصون الحب وسنيني

ولو قلبي رجع حبك بولع فيه بالنيران
وبكسرها انا رجلي اذا صوبك توديني

ولو دار الزمن ضدك وجيتي تطلبي الغفران
وجبتي الشمس في كفك لعندي ما بتلقيني

تقول الناس في وصفك جميله مثل عود البان
وانك أجمل وأحلى بشر مخلوق من طيني

وانك غالية وأثمن من الياقوت والمرجان
تقوم أكوان من شانك وتقعد لك بلاديني

حساافه غرهم شكلك وياما تخدع الالوان
عموما.. قد بقت كلمة أخيرة لك وسمعيني

اذا كنتي بنظر غيري ملاك في شكل أنسان
قسم بالله ما تسوي قصيدة في نظر عيني

""" ابي رأيكم في هذة القصيدة من الشاعر"سلطان" اعجبتني كثير وحبيت انشرها لمحبين الشعر