بليل الساعه تسع بع العشا كل الي فالبيت كانو يالسين برا فالحوش و الشواب فالخيمه
محمد يوجه كلامه لسيف اخوه : شورايك نتفتح سالفه روحتنا لصلاله لابويه الحين جدام عمي مطر يمكن عمي يشجعه عقبها كلنا بنسير
سيف : والله فكره
خالد و سالم : شو السالفه من ناوي يسير صلاله؟
محمد : والله يا بابووليد خنا بعد الامتخانات قلنا نبا نغير جو و نسير عمان و انسب مكان هناك صلاله
سيف : وبنسير بسياييرنا مب الفالطياره
خالد : والله فكره عاد ابويه تعيبه هالطلعات
سيف : بس ابويه يمكن مايطيع لانه امي و خواتي مب متعودات عالخط و سفرات البر نخاف ياثرن عليه ولا هو ما يخالف عليه
سالم : انته ماعليك خلنا نسير نعرض عليهم افكره و بنشوف و تراهم كلهم يالسين والي عنده شي بيقوله و ماظني امك بتقول شي جدام ابوي بتخيل
محمد : هذا الي انا فطرت فيه
سيف : والله طلعتوا مب هينين ياليهالو
محمد : يلا عاد جب انا اذكى عنك
سيف بعصبيه : بتسكت ولا تباني اخم بك هالحوش و انظفه
خالد يهدي الوضع : بس خلاص تبون تخربون علينا خلنا نسير لهم
في الصوب الثاني البنات يالسات بعيد شوي عن الشباب
نوره بفضولها المعتاد : اقول يواري متشوفن اخوانه جنهم يرمسون في سالفه خطيره
شيخه : صدقج انا اشوفهم من ساعه يتساسرون خاطري اعرف شو عندهم
اليازيه : ماشالله انتن اهني بس عقلكن عنهم شو اسمي هذا
نوره : والله فاضيه ................شوفيهم ساروا صوب الشوبه خلنا نحن بعد نسير بنشوف اشوراهم
و سارن وهن يسحبن يزوي وهي تتحلطم: والله اسميكن متفيجات
عند الخيمه الكل يالس يسولف و فتح السالفه خالد
خالد : ابويه شو رايك انسير نحن و قوم عمي صلاله نغير جو؟؟؟؟؟؟؟؟؟؟؟؟؟؟
سيف : والله انك يبتها يابو وليد مشيه حلوه و بنسير بر مب جو
ام سيف بدت الضيقه على ويهها و هي تشوف بوسيف جنه عيبته الفكره و بوخالد اكثر عنه بغت تفتح حلجها بس محمد انتبه لها وما خلاها ترمس على طول قال
محمد : ربعنا كلهم بسيرون و امبونهم الخلق كلهم هناك يقيضون
بوخالد : ماعليه بس اشعالنا
سالم : يابوي لاحقين .......... شو ماشي راحه ابدا
بوسيف : صدقه سالم شو رايك نسير جماعه
بوخالد : هيه بس متى الحين نهاية شهر سته و الجو في صلاله احلى شي في نص سبعه ونحن مب مزهبين شي لسيرتنا خلونا نخلص اشغالنا و نرتب امورنا عقب بنقرر متى نتحرك...........ها شو الراي
بوسيف : امره الي قلته ............صار
البنات وايد استانسن على هالفكره خصوصا يزوي و شيخه و حتى ام خالد اما ام سيف و نوره ماهتمت لانهن يحاتن الخط وايد بس نوره تشجعت عقب ماشافت هاللمه الحلوة و قررت تستانس معاهم بس الي صدمها و غير مزاجها الي قاله خالد
خالد : وشو رايك ابويه نقول لقوم عمتي يسيرون ويانا؟؟؟؟؟؟؟؟؟؟؟؟؟؟
بوخالد : خلاص من نوصل هناك بنخطط لكل شي و بنشوف من بيسير ويانا ............ وبعد احسن لان قوم عمتك عندهم ثلاثه يسوقون و نحن ما عندنا الا انا و بوسيف وخالد بس و لما هم بيسيرون ويانا بنكون سته بنتساعد ما نبا عندنا دريوليه
سالم : هيه والله صدقك حمد و جابر و سعود و عاد هم يحبون الطلعت وبنات عمتيه بيستانسن
نوره في خاطرها : هذا الي كان قاصرني احسنلي ايلس وما اسير
عقب الساعه عشر كل الشوبه انسحبوا واحد ورا الثاني ما يرومون عالسهر الا الشباب و البنات ايلسو يسولفون برا فالجو الحلو بس نوره كان باين عليها الضيقه و ما حبت تسهر معهم وقررت تنسحب وقامت عنهم
خالد بسرعه قال : ويييييييييين سايره ايلسي سولفي عندنا عقبها ما بنشوفج الا من نسير كلنا صلاله
نوره وهي بعدها واقفه ما تحركت قالت فخاطرها : شو تبا فيني انا.........ونته عقلك كله عند قوم عمتك .......... فكرت شوي قبل ما ترد عليه عقبها قالت : مالي نفس ايلس تعبانه بسير ارقد
الكل استغرب من رد نوره القاسي على خالد خصوصا انه هاذي آخر يلسه لهم مع بعض لانهم باجر مسافرين
اليازيه خزتها بعين عقب قالت عسب تعدل الوضع : نوير مب متعوده عالسهر ...............ترقد من وقت خلوها الديايه سيري ارقدي
سالم : ههههههههههههههههههههه احيدها ديايه
وسارت عنه نوره بدون ماترد عليه
الكل ضحك على نوره الا ........................ خالد الي حط في خاطره من رد نوره للدرجه هاذي يا نوره تكرهين اليلسه معاي .... حرام عليج انا شو مسوي عشان تعامليني بهالطريقه.......... انا احبج و اموت عالارض الي ادوسها ريلج و نتي ما تتحملين تيلسين معاي دقيقه ......... ليش ........ ليييييييييييييش والله ما سويت شي يا ما حاولت ابين لج حبي ونتي ولا اهني ولا كأن في واحد يمووووت عليج.......ليش لله بلاني بحب هالبارده عديمة الاحساس انا لازم انساها ولا افكر بها دامها جي تعاملني و تم خالد على هالحال طول الليل مارقد
مب هو بس الي مارقد فالطرف الثاني من البيت حتى نوره مارقدت و تفكر بخالد ......... الظاهر انه مب بس محير بنت عمته الا يحبها ولا يصبر على فراقها و انا معذبه عمري من طراه لي ابوي وانا افكر به............ ليش افكر فيه اصلا انا ما احبه ولا عمري بحبه .......اصلا انا اكره .......... انزين يوم انج ماتحبينه ليش يالسه تفكري فيه؟؟؟؟؟؟؟؟؟؟ ليش تضايقتي يوم تذكرتي انه محير بنت عمته؟؟؟؟؟؟؟؟ليييييييييييش تعفس ويهج من طرى بيت عمته؟؟؟ ليش مجرد فكرة انه يمكن يكون يحب فاطمه بنت عمته ضايقتج ؟؟؟؟؟؟؟؟؟؟؟؟حرام ماقدر استحمل هالفكره احسني كرهته و كرهت كل شي يتعلق به ماريده ماريد اشوفه مره ثانيه ............. وفوق هذا يباهم يسروا عندنا صلاله ..........ياربي كيف بتحمل شوفتهم مع بعض لااااااااااااااااااااااااااااااااااااااااااااااااا اااااا
و هذا كان حال نوره وخالد لين اذن الفجر صلو و عقبها يالله عقب مضارب رقدو عقب ما قرر خالد انه ينسى بنت عمه نوره ولا يفكر فيها و البعد بساعده على هالشي
ثاني يوم الصبح قام بوخالد و قرر انهم يتحركون من الساعه ست الصبح و سارت ام خالد توعي كل عيالها
ام سيف : الله يهداكم بس يام خالد تو الناس على سيرتكم .......... يلسو عندنا كم يوم عقبها يصير خير حاولي تقنعين ريلج
ام خالد : والله ماشي فايده فيه يبا يلحق على شغله..........انشالله بنتلاقى اذا اتفقنا على رحلتنا لصلاله
ام سيف : ماشي فايده فيكم.......... كلكم راسكم ياااااابس ........ بسير ازهب الريوق
فالمجلس الداخلي بوخالد كان يكلم اخوه ومحد كان معهم : مطر في سالفه ابا اكلمك فيها وما حصلت فرصه الا الحين
بوسيف : آمرني اخوي ......خير انشالله
بو خالد : والله كيف اقولك السالفه معرف كيف ابدا بها
و كان يكلم اخوه بوسيف بسالفه محد يعرفها وكانو يتكلمون بصوت واطي محد يسمعه غيرهم .......... عقب ما خلصوا من السالفه قال
بو سيف : الله يقدم الي فيه الخير انشالله و انشالله فالك الطيب و لوعليه جان قتلك شل البنيه بعباتها من الحينه
بوخالد : الأصول اصول ونا خوك ...... شوف الاهل بس نبا الرد السريع منكم والله يتمم على خير
بوسيف : والله مالنا بد منكم بس هذا زواج ........... تعرف لازم نشاور الاهل والبنت
خالد لحق على آخر جمله ومن طلع عمه من المجلس بعد ما صبح عليهم يلس مع ابوه
خالد : هااااا ابويه شكلك فتحت السالفه مع عمي صح!!؟؟ بشر انشالله قبول
بوخالد : بنشوف خير ونته لتقول لحد قبل ما نتاكد من السالفه و يتم كل شي
خالد : انشالله هاذي فاتحة خير
وعقب الريوق سارو كلهم الحوش يودعون قوم عمهم وكل العيال زعلانين لانهم بيتفارقون و نوره ما نزلت بس سلمت على شيخه و بلغتها تسلم عالكل بحجة انها ما تحب الوداع