شي يخصك باقي عندي قلب من غيرك وحيد

مايبي يبقى معاي يا أجيلك أو يجيلك

يسألوني الناس عنك وليه ما أكتب قصيد

قول لاتسكت تكلم وش أجاوبهم دخيلك

أختلفنا وماعرفنا شنهو الرأي السديد

ياتضحي في عنادك أو أضحي في سبيلك

ليه كل عيد نتفارق صرت أكره كل عيد

وأنت فارق في غلاتك وقلبي ماعنده مثيلك

المشاعر من غيابك يا دفا احساسي جليد

طحت من عيني لقلبي وما قدرت إني أشيلك

يشهد الله من رحلت وفي حياتي لاجديد

وكل ما ألمح سرابك أرتبك الله وكيلك

حالتي صعبه بدونك وكيف حالك يابعيد

أشتكي منك إليك ومن جروحي أشتكيلك

والله ماقصرت فيني بس ودي لو تزيد

يعني إذبحني وكمل يا بعد قلبي جميلك

أدري غلطاتي كثيرة وفوق كل هذا عنيد

وش تسوي هذا حظك رغم زلاتي خليلك

أقتلك لا من خطيت ويا عسى عمرك مديد

وأعذرك لو كنت قاتل لانه يستاهل قتيلك

ويلي منك لو نسيتك والزعل طبعا شديد

ولو أحس بلحظة إنك منشغل عني ياويلك

جيتهم طيب وأدري في زماني مايفيد

وش حصيل الطيب فيهم ومن فراقي وش حصيلك

بترك الدنيا عشانك دام هذا ماتريد

ويا عسى كلمة عشانك تشفي يا روحي غليلك

الدليل إني أحبك صرت أحسك بالوريد

وأدري في قلبك يحبني دون ما أسمع دليلك

في عيونك صرت شاعر واصل القمة فريد

و صرت تسوى في عيوني كل بني جنسك وجيلك